"ძალოვან უწყებებს ვერ ვენდობით, ე.წ გასაღები ცალკე სამსახურს უნდა ჰქონდეს"

"ძალოვან უწყებებს ვერ ვენდობით, ე.წ გასაღები ცალკე სამსახურს უნდა ჰქონდეს" - კლდიაშვილი

პოლიტიკა - 14:14, 27 Dec, 2016

721

"თავისუფლების განვითარების ინსტიტუტის დირექტორი გიორგი კლდიაშვილი "ნიუპოსტთან" ამბობს, რომ აუცილებელია ე.წ. გასაღების გარეთ გატანა და დამოუკიდებელი მაკონტროლებელი უწყების შექმნა. მისივე თქმით, არასამთავრობო სექტორის ინიციატივით, ცალკე სამსახური უნდა იყოს პარლამენტისგან უფლებამოსილი, რომელიც ზედამხედველობას გაუწევს მოსმენების საკითხს.
კლდიაშვილი პარლამენტის თავმჯდომარის მოადგილის გია ვოლსკის შეფასებასაც გამოეხმაურა, რომელიც თვლის, რომ ფარულ მოსმენებთან დაკავშირებული ე.წ გასაღები ძალოვან სტუქტურაში უნდა იყოს.
"შეფასება, რომ სუს-ი უნდა იყოს ჩართული, ცოტა გასაკვირია, რადგან ეს უწყება ისედაც ჩართულია. იმის თქმა, რომ სახელმწიფო უსაფრთხოების სამსახური მოსმენებში საერთოდ არ უნდა იყოს ჩართული არასწორია. აქ არის საუბარი იმ საშიშროების პრევენციაზე, რომელსაც ჰქვია იმ უფლებამოსილების გადამეტება, რაც მიცემული აქვს ძალოვან სტრუქტურებს, რომ ფარული მიყურადება განახორციელონ. ფარული მიყურადება ლეგიტიმური უფლებაა და ვალდებულება ძალოვანი უწყებების, უბრალოდ არ უნდა მოხდეს იმ პრაქტიკის გაგრძელება, რომელიც არ გამოსწორებულა.
დღეს კვლავაც ხდება ფარული მიყურადება, ამას პირდაპირ ვაცხადებ. ჯერაც არსებობს ჩანაწერები, და საჭიროების შემთხვევაში ხდება მათი გამოქვეყნება. შესაბამისად საშიშროება, რომ ფარული მიყურადება ისევ განხორციელდეს უკანონოდ არსებობს"- აღნიშნა თავისუფლების განვითარების ინსტიტუტის დირექტორმა.
მისი თქმით, ვინაიდან სრული მექანიზმი, ე.წ გასაღები ძალოვანების ხელშია, ფარული უკანონო მიყურადების ფაქტებს არასამთავრობო ორგანიზაციები ვერ ამტკიცებენ.
"ჩვენი მოთხოვნაა შეიქმნას სააგენტო, რომელსაც სრული პასუხისმგებლობა ექნება და იარსებებს პარლამენტის მანდატით და რომელიც უშუალოდ გააკონტროლებს ფარული მიყურადების კანონიერებას. ე.წ გასაღებიც ამ უწყებას უნდა ჰქონდეს. დღეს კი ეს გასაღები სუს-ს, შსს-ს და ვისაც მოეპრიანება იმას აქვს. ჩვენ რომ ნორმალურ ქვეყანაში ვცხოვრობდეთ, სადაც პოლიტიკური ინტერესების გამო ადამიანების პირადი ცხოვრების გამოქვეყნების შანტაჟი არ ხდება, მაშინ პრობლემა არ იქნებოდა. თუმცა ფაქტს, რომ უკანონო ფარული მიყურადება ხდება, ამას ვერც გიორგი ვოლსკი უარყოფს და ვერც ვერავინ. ჩვენ ძალოვან უწყებებს ვერ ვენდობით, თავისი საქმიანობით არც შსს-ს და არც სუს-ს ნდობა არ მოუპოვებიათ საზოგადოებაში, ცხადია ვოლსკი ენდობა რადგან ხელისუფლებაშია"- უთხრა "ნიუპოსტს" გიორგი კედელაშვილმა.