არასამთავრობოები მოსმენების კანონის უმოქმედობაზე საუბრობენ

პოლიტიკა - 12:27, 26 Dec, 2016

1287

პარლამენტში ადამიანის უფლებათა დაცვის კომიტეტი არასამთავრობო სექტორის წარმომადგენლებს შეხვდება. საქმე ეხება ე.წ. მოსმენების შესახებ კანონს.

„ახალგაზრდა იურისტთა ასოციაციის“ თავმჯდომარე ანა ნაცვლიშვილი აცხადებს, რომ არასამთავრობო სექტორი მზად არის ე.წ. მოსმენების შესახებ შემუშავებული მოდელი ახალ პარლამენტს გააცნოს.

ნაცვლიშვილის თქმით, მოდელი, რომელიც არასამთავრობოებმა შეიმუშავეს, იყო ე.წ. მოსმენების გასაღების დამოუკიდებელი სააგენტოს ხელში გატანა, რაც მეტი გარანტი იქნება, რომ ე.წ. გასაღების ფლობა არ გახდეს მისი ბოროტად გამოყენების შესაძლებლობა.

„ერთ-ერთ მოდელი, რომელიც არასამთავრობო ორგანიზაციებმა შევიმუშავეთ, ეს იყო საერთოდ გარეთ გატანა დამოუკიდებელი სააგენტოს ხელში გასაღების გადაცემა, რაც შეიძლება იყოს უფრო მეტი გარანტი იმისა, რომ გასაღების ფლობა არ გახდეს მისი ბოროტად გამოყენების შესაძლებლობა. ეს უნდა იყოს დამოუკიდებელი სააგენტო, რა თქმა უნდა, მას ბმა ექნება პარლამენტთან. ის არ იქნება აღმასრულებელი ხელისუფლების ნაწილი, ის იქნება დამოუკიდებელი ინსტიტუცია, რომელსაც გასაღების კონტროლის ფუნქცია მიენიჭება,“-განაცხადა ანა ნაცვლიშვილმა.

ახალგაზრდა იურისტთა ასოციაციის ხელმძღვანელი განმარტავს, რომ აუცილებელია ე.წ. გასაღების გარეთ გატანა და დამოუკიდებელი მაკონტროლებელი უწყების შექმნა.

არსებული მექანიზმის უმოქმედობაზე საუბრობს ინფორმაციის თავისუფლების განვითარების ინსტიტუტის დირექტორიც.

„ჩვენ ვართ საკმაოდ მკაცრი იმ პოზიციაზე, რომ მოდელი, რომელიც იყო აქამდე, არ მუშაობს. ჩვენ გვაქვს სერიოზული ხარვეზები და ჩვენთვის მნიშვნელოვანია, რომ გასაღები იქნას გამოტანილი და რაც მთავარია, შეიქმნას ცალკე სააგენტო, ცალკე სამსახური, რომელიც იქნება პარლამენტთან და რომელიც ზედამხედველობას გაუწევს მოსმენების საკითხს,“ - აცხადებს გიორგი კლდიაშვილი.