დოლარის გამყარებისა და ლარის დევალვაციის ფონზე, მთავრობა 2017 წლიდან 10 პუნქტიანი გეგმის ამოქმედებას აპირებს. თუმცა, ოპოზიცია და ექსპერტები ამ გეგმას წარმატებულს არ უწოდებენ და ფიქრობენ, რომ ქვეყანას ეს 10 პუნქტიანი გეგმა უფრო დიდ ჩიხში შეიყვანს.

ლარის გაუფასურება ბევრ საკითხზე უარყოფითად აისახა. როგორც ჩანს არც ელექტროენერგია დარჩა „უყურადღებოდ“. მართალია სები ტარიფის მომატებაზე ჯერჯერობით არაფერს არ ამბობს და აცხადებს, რომ მსგავს კითხვებს პასუხი მომავალი კვირის ორშაბათ დღეს გაეცემა, მაგრამ საზოგადოება დენის გრაფიკით მიწოდებაზე საუბრობს. დენის გრაფიკი, რომელსაც თელასი ტექნიკურ სამუშაოებს უწოდეს, ყოველდღურად მოქმედებს დედაქალაქის ყველა რაიონში. იგივე სურათა საქართველოს მასშტაბით - საქართველო გასული საუკუნის 90-იანებს უბრუნდება.

დღეს, 22 დეკემბერს, გათიშულია ფაქტობრივად ნახევარი თბილისი, რამდენიმე სკოლიდან ბავშვებიც კი დაითხოვეს, მათ შორის ჩვენი ინფორმაციით ჩუღურეთში 29-ე საჯარო სკოლიდან და სასწავლო პროცესი შეწყვიტეს. გათიშულია ისეთი ცენტრალური უბნები როგორიცაა რუსთაველისა და აღმაშენებლის გამზირი, ასევე გმირთა მოედნის მიმდებარე ტერიტორია.

რეგიონებშიც მსგავსი სიტუაციაა, როგორც „ნიუპოსტს“ ქუთაისიდან აუწყეს, დენის გრაფიკით მიწოდების გამო სკოლებში სასწავლო პროცესი უკანასკნელი დროის მანძილზე არაერთხელ შეწყვეტილა.

ექსპერტები იმასაც ამბობენ, რომ თუ ტარიფზე ფასმა არ მოიმატა, ელექტროენერგიის გრაფიკით მიწოდება მოსახლეობისთვის გარდაუვალი იქნება, რაც საქართველოს კვლავ გასული საუკუნის 90-იან წლებში დააბრუნებს.