"არავის აქვს იმის ილუზია, რომ ლარის ამ დონის გაუფასურება, პირდაპირ არ აისახება ელექტროენერგიაზე და გაზის ტარიფზე"

პოლიტიკა - 19:48, 21 Dec, 2016

2498

ნაციონალური მოძრაობის წაევრი გიორგი ტუღუში ელექტროენერგიასა და გაზის ტარიფების გაზრდას ვარაუდობს. მისი თქმით, ხელისუფლება ვერ აღიქვას იმ საფრთხეებს და კრიზისის სიმძიმეს, რომელშიც ქვეყანა იმყოფება.

„გახსოვთ ალბათ, უკვე იყო ერთი ტალღა, როდესაც ლარმა დაიწყო გაუფასურება, მაშინ მოხდა ტარიფის გადახედვა. მაშინაც გვარწმუნებდა ხელისუფლება, რომ ეს არ შეეხება ელექტროენერგიის და გაზის ტარიფს, მაგრამ საბოლოო ჯამში, დღეს უფრო მძიმე ვითარებაში ვართ. არავის აქვს იმის ილუზია, რომ ლარის ამ დონის გაუფასურება, პირდაპირ არ აისახება ელექტროენერგიაზე და გაზის ტარიფზე,“ - აღნიშნა ტუღუშმა.

ტუღუში პურის ფასის მატებაზეც საუბრობს.

„აქციზის გაზრდილი გადასახადი, რა თქმა უნდა, გააძვირებს როგორც დიზელს, ასევე ბენზინს და ამას არ სჭირდება დიდი ეკონომისტობა, როდესაც საწვავი ძვირდება, ყველაფერზე იწყებს ფასების მატება,“ - განაცხადა ტუღუშმა.

ლარის გაუფასურების შესახებ, გიორგი ტუღუში აცხადებს რომ ხელისუფლების გეგმა არა თუ ჩავარდა, არამედ მან უკუეფექტი გამოიღო.

„მას შემდეგ, რაც მათ 10 პუნქტიანი გეგმა გამოაქვეყნეს, ლარმა კატასტროფულად დაიწყო ვარდნა. ოცნება ხალხს დაპირდა სწრაფ განვითარებას, საბოლოო ჯამში ვხედავთ, რომ სწრაფად რაც ვითარდება, ეს არის ცუდი კუთხით განვითარება მთლიანად ტარიფების,“ - განაცხადა გიორგი ტუღუშმა.