გუგული მაღრაძე საქართველოს აზერბაიჯანელ ქალთა კავშირის ახალგაზრდული ფრთის წარმომადგენლებს შეხვდა

პოლიტიკა - 19:22, 21 Dec, 2016

928

განათლების, მეცნიერებისა და კულტურის კომიტეტის თავმჯდომარის მოადგილე, გუგული მაღრაძე საქართველოს აზერბაიჯანელ ქალთა კავშირის ახალგაზრდული ფრთის წარმომადგენლებს შეხვდა და მათ საკანონმდებლო ორგანოს ძირითად ფუნქციებზე, მნიშვნელობაზე და საქმიანობაზე ესაუბრა.
დეპუტატმა ახალგაზრდებს საკანონმდებლო პროცესის შესახებ მიაწოდა ინფორმაცია. მათ პარლამენტის სტრუქტურა, ფუნქციები და ის საკანონმდებლო ბაზა გააცნო, რითაც პარლამენტის საქმიანობის ძირითადი პრინციპები განისაზღვრება.
გუგული მაღრაძე ახალგაზრდებს კომიტეტის სტრუქტურაზე, მუშაობის სპეციფიკასა და კანონპროექტის განხილვა-მიღების ეტაპებზე ესაუბრა.
დეპუტატმა ახალგაზრდებს ის პროგრამებიც გააცნო, რომელიც ქვეყანაში სახელმწიფო ენის მაღალ დონეზე შესწავლისთვის ხორციელდება. შეხვედრისას, მან ყურადღება გაამახვილა პარლამენტის მიერ, წინა კვირას მიღებულ „გრანტების შესახებ“ კანონზეც, რომლის თანახმად, „ჟვანიას სკოლას“ და „მასწავლებელთა დახელოვნების ინსტიტუტს“ რეგიონებში ქართული ენის სწავლების გაუმჯობესების მიზნით, მცირე გრანტების გაცემა შეეძლებათ.
შეხვედრაზე, გუგული მაღრაძემ, სახელმწიფო ენის ცოდნის მნიშვნელობასა და აუცილებლობაზე ისაუბრა. ასევე ყურადღება გამახვილდა იძულებით და ადრეულ ქორწინებასთან დაკავშირებით და იმ ახალ რეგულაციებზე, რომელიც წინა მოწვევის პარლამენტმა მიიღო.
დეპუტატმა მოსწავლეების მიერ დასმულ შეკითხვებს უპასუხა, რომელიც ძირითადად, ეროვნული უმცირესობებით დასახლებულ რეგიონებში სახელმწიფო ენის შესწავლის გასაუმჯობესებლად საჭირო ღონისძიებების გატარებას ეხებოდა.
შეხვედრის დასრულების შემდეგ, აზერბაიჯანელ ქალთა კავშირის ახალგაზრდული ფრთის წარმომადგენლებს პარლამენტში ექსკურსია ჩაუტარდათ.