საგარეო ურთიერთობათა კომიტეტის თავმჯდომარე შვედეთის სამეფოს ელჩს, მარტინა ქვიქს შეხვდა

პოლიტიკა - 17:36, 19 Dec, 2016

1323

გაცნობითი ხასიათის შეხვედრაზე მხარეებმა ქვეყნებს შორის არსებული ურთიერთობებზე, ორმხრივ საპარლამენტო თანამშრომლობასა და სამომავლო გეგმებზე ისაუბრეს.

კომიტეტის თავმჯდომარის განცხადებით, საუბარი ასევე შეეხო შვედეთის პარლამენტის საგარეო საქმეთა კომიტეტის წევრების ვიზიტს საქართველოში, რომელიც მომავალი წლის დასაწყისისთვისაა დაგეგმილი, „მივესალმებით ამ ვიზიტს და ეს იქნება ძალიან კარგი დასაწყისი ორმხრივი საპარლამენტო ურთიერთობების გაძიერებისათვის და გაღრმავებისთვის“, - განაცხადა სოფიო ქაცარავამ.

კომიტეტის თავმჯდომარემ შვედეთის ელჩს მადლობა გადაუხადა ვიზალიბერალიზაციისა და ევროპულ ინსტიტუტებთან ინტეგრაციის მიმართულებით საქართველოს მხარდაჭერისთვის.

შეხვედრაზე აღინიშნა, რომ შვედეთი მზადაა და აგრძელებს საქართველოს მხარაჭერას. განსაზღვრულია და მოიმატებს პროგრამების დაფინანსება, რომელიც შვედეთის სამეფოს მხრიდან საქართველოში ხორციელდებოდა. „ეს არის სამი ძირითადი მიმართულება. გარემოს დაცვის, ადამიანის უფლებებისა და დემოკრატიის და საბაზრო-ეკონომიკური პრინციპების კუთხით და ეს ძალიან მნიშვნელოვანია“, - განაცხადა კომიტეტის თავმჯდომარის მოადგილემ, დიმიტრი ცქიტიშვილმა.

სტუმარმა, თავის მხრივ აღნიშნა, რომ შვედეთი, აღმოსავლეთ პარტნიორობის ფარგლებში, ევროკავშირთან თანამშრომლობის ახალ ეტაპზე საქართველოს მხარდაჭერისათვის მზად არის.

მხარეებიმომავალში აქტიური თანამშრომლობის გაგრძელებასა და გაღრმავებაზე შეთანხმდნენ.