"ეტყობა დანაშაული მატულობს, სტატისტიკის დამალვა შესაბამის რეაგირებას გამოიწვევს"

"ეტყობა დანაშაული მატულობს, სტატისტიკის დამალვა შესაბამის რეაგირებას გამოიწვევს" - შავგულიძე შს მინისტრს აკრიტიკებს

პოლიტიკა - 15:30, 19 Dec, 2016

1956

„თავისუფალი დემოკრატების“ ერთ-ერთი წევრი შალვა შავგულიძე "ნიუპოსტთან" შინაგან საქმეთა მინისტრის იმ განცხადებას გამოეხმაურა, რომლის მიხედვითაც დანაშაულის სტატისტიკა აღარ გამოქვეყნდება.

როგორც შალვა შავგულიძემ აღნიშნა, საზოგადოებამ უნდა იცოდეს რამდენად ეფექტურია შს სამინისტრო დანაშაულთან ბრძოლაში.
ამასთან "თავისუფალი დემოკრატების" ერთ-ერთი ლიდერი ამბობს, რომ მინისტრის გადაწყვეტილება დემოკრატიულ და სამართლებრივ სახელმწიფო სტანდარტს ეწინააღმდეგება.
"ალბათ იმიტომ აკეთებს შსს ამას, რომ რეალური სტატისტიკა არახელსაყრელია დღევანდელი ხელისუფლებისთვის და მისი იმიჯისთვის. ეტყობა დანაშაული კი არ მცირდება, არამედ მატულობს და არ უნდა რომ ეს საზოგადოებას დაანახოს. პირიქით, რაც უფრო მეტს დამალავს, მისთვისვე ძალიან ცუდია. აღარაფერს ვიტყვი იმაზე, რომ ეს გადაწყვეტილება ღია მმართველობის პრინციპთან ერთად, დემოკრატიულ და სამართლებრივ სახელმწიფო სტანდარტს ეწინააღმდეგება. საზოგადოებამ უნდა იცოდეს რამდენად ეფექტურია ხელისუფლება სხვადასხვა სფეროებში და მათ შორის სამართალდამცავ სფეროში. ეს არის უფლება მოქალაქის, რამდენად ეფექტური მთავრობა ჰყავს. სტატისტიკა აუცილებლად უნდა გამოქვეყნდეს, საზოგადოებამ უნდა იცოდეს მისი ხელისუფლება რამდენად ეფექტურია, რამდენად წარმატებულია, როგორ ებრძვის დანაშაულებრივ სამყაროს. თუ ოფიციალურად გამოაცხადეს, რომ დანაშაულებრივ სტატისტიკას აღარ გამოვაქვეყნებთო ეს მათი არჩევანია და ამას შესაბამისი რეაგირება მოჰყვება საზოგადოების მხრიდან"- აღნიშნა შავგულიძემ.
შინაგან საქმეთა მინისტრის განცხადებით, დანაშაულის სტატისტიკა მისი ბრძანებით არ ქვეყნდება. მე მივიღე გადაწყვეტილება და მე ვარ პასუხისმგებელი იმაზე, რომ სტატისტიკა არ ქვეყნდება, - ამის შესახებ შს მინისტრმა გიორგი მღებრიშვილმა ჟურნალისტებს დანაშაულის სტატისტიკასთან დაკავშირებულ საკითხზე კომენტირებებისას განუცხადა. მინისტრის თქმით, შს სამინისტროს კანონი არ ავალდებულებს, რომ სტატისტიკა გამოაქვეყნოს.