პარლამენტი ევროკავშირი-საქართველოს ასოცირების საპარლამენტო კომიტეტის მესამე სხდომას უმასპინძლებს

პოლიტიკა - 22:38, 18 Dec, 2016

1015

19-20 დეკემბერს, საქართველოს პარლამენტში, თბილისში, ევროკავშირი-საქართველოს ასოცირების საპარლამენტო კომიტეტის მესამე სხდომა გაიმართება, რომლის მუშაობაშიც მონაწილეობას მიიღებენ საქართველოს პარლამენტისა და ევროპარლამენტის მუდმივმოქმედი დელეგაციები ევროკავშირი-საქართველოს საპარლამენტო ასოცირების კომიტეტის თანათავმჯომარეების, თამარ ხულორდავას და საჯად კარიმის (გაერთიანებული სამეფო, კონსერვატორების და რეფორმატორების პოლიტიკური ჯგუფი) ხელმძღვანელობით.

ასოცირების საპარლამენტო კომიტეტის მესამე სხდომის ფარგლებში დაგეგმილია ორმხრივი შეხვედრები საქართველოს პარლამენტის თავმჯდომარესთან, პრემიერ მინისტრთან, პრეზიდენტთან და მთავრობის წევრებთან. მხარეები განიხილავენ საქართველოსა და ევროკავშირის შორის ურთიერთობებს, ასოცირების ხელშეკრულების განხორციელების მიმდინარეობას და საპარლამენტო თანამშრომლობის შემდგომ პერსპექტივებს.

ვიზიტის დასასრულს, 20 დეკემბერს, 16:00 საათზე, დელეგაციების ხელმძღვანელები გააკეთებენ ერთობლივ განცხადებას და მედიისთვის გამართავენ ბრიფინგს.

ევროკავშირი-საქართველოს საპარლამენტო ასოცირების კომიტეტი (EU-Georgia Parliamentary Association Committee) შედგება, ერთის მხრივ, საქართველოს პარლამენტის წევრების და მეორეს მხრივ, ევროპარლამენტის წევრებისაგან. ეს ორგანო ერთ-ერთია იმ ინსტიტუციური ჩარჩოდან, რომელსაც ასოცირების ხელშეკრულება ადგენს ევროკავშირსა და საქართველოს შორის თანამშროლობისთვის, აღმასრულებელ ხელისუფლებაში მოქმედი ასოცირების საბჭოსა და ასოცირების კომიტეტებთან ერთად. ასოცირების ხელშეკრულების თანახმად (კარი VIII, თავი I, მუხლი 410), საპარლამენტო ასოცირების კომიტეტი ხელს უწყობს საპარლამენტო დიპლომატიის განვითარებას და ევროპარლამენტსა და საქართველოს პარლამენტს შორის კავშირის განმტკიცებას. კომიტეტის რეგლამენტის თანახმად, კომიტეტის სხდომები იმართება წელიწადში ორჯერ, მონაცვლეობით, თბილისსა და ბრიუსელში. სხდომებზე მიიღება დასკვნითი განცხადება ან რეკომენდაციები ასოცირების ხელშეკურლების განხორციელების ხელშესაწყობად.

საქართველოს პარლამენტის მუდმივმოქმედი დელეგაციის მთავარი მიზანია ხელი შეუწყოს და განავითაროს საქართველოსა და ევროკავშირის თანამშრომლობა, განახორციელოს ზედამხედველობა ასოცირების ხელშეკრულების შესრულებასა და გამოყენებაზე, განამტკიცოს კავშირი საქართველოს პარლამენტსა და ევროპარლამენტს შორის და ამ გზით, მხარი დაუჭიროს საქართველოს ევროპასთან ინტეგრაციას.