აშშ-ს არჩეულმა პრეზიდენტმა დონალდ ტრამპმა აზერბაიჯანში სასტუმროს აშენებასთან დაკავშირებული სალიცენზიო შეთანხმება გააუქმა და გეგმავს, რომ იგივე ნაბიჯი გადადგას საქართველოში დაგეგმილი პროექტის შემთხვევაშიც.

ორივე პროექტი ან დაკავშირებულია ან ასოცირდება ისეთ ადამიანებთან, რომლებსაც პოლიტიკასთან აქვთ კავშირი, რამაც შესაძლოა პრობლემები შექმნას დონალდ ტრამპის გაპრეზიდენტების შემთხვევაში.

ტრამპის კომპანიამ მიმდინარე კვირის დასაწყისში კიდევ ერთი სალიცენზიო შეთანხმება გააუქმა, რომლის მიხედვითაც ბრაზილიაში სასტუმრო უნდა აეშენებინა. გარდა ამისა, ტრამპის ორგანიზაციამ დელვიარში დარეგისტრირებული ოთხი კომპანია დახურა, რომელიც ბიზნეს-ოპერაციებს არ ახორციელებდა, მაგრამ კავშირი ჰქონდა საუდის არაბეთთან.

როგორც ტრამპის ადვოკატმა ალან გარტენმა განაცხადა, აზერბაიჯანში, საქართველოსა და ბრაზილიაში დაგეგმილი პროექტების დეველოპერებმა სალიცენზიო შეთანხმების პირობები ვერ დააკმაყოფილეს. ის მომხდარს ჩვეულებრივ ამბად მიიჩნევს და ამბობს, რომ ეს გადაწყვეტილება არ არის პოტენციური ინტერესთა კონფლიქტის თავიდან ასაცილებლად გადადგმული ნაბიჯი.

მასალას "საზოგადოებრივი მაუწყებელი" Dailymail - ზე დაყრდნობით ავრცელებს.