,,ჰუმანიდის” სკანდალი - ,,საპარტნიორო ფონდმა 9 მლნ კრედიტი გამოყო და არა 30, საიდან გაჩნდა ეს ციფრი, არვიცი“

პოლიტიკა - 15:49, 16 Dec, 2016

4443

„ჰუმანიდთან“ დაკავშირებით ატეხილი ხმაურის ინიციატორებიდან არცერთი პირადად მე არ დამკავშირებია და არ დაინტერესებულა, რომ ჩემგან მიეღოთ ინფორმაცია, – ამის შესახებ „კვირას“ პრესკლუბში გამართულ პრესკონფერენციაზე საპარტნიორო ფონდის ხელმძღვანელმა დავით საგანელიძემ განაცხადა.

საგანელიძე იმ აჟიოტაჟს ეხმაურება, სადაც საუბარი „ჰუმანიდს“ შეეხება. საგანელიძის ინფორმაციით, ფარმაცევტული ქარხნის მშენებლობისთვის საპარტნიორო ფონდმა “ჰუმანიდს“ კრედიტი გამოუყო, რომელიც 9 მილიონ ლარს შეადგენს.

„ეს თანხა არის 9 მილიონი და არა 30, როგორც ამას ამბობენ. საიდან გაჩნდა საერთოდ ეს ციფრი, არ ვიცი.

საპარტნიორო ფონდმა „ჰუმანიდს“ არ აჩუქა ეს ფული, ეს არის კრედიტი, რომლის უკანაც საკმაოდ მყარი საბანკო გარანტიებია, თუ “ჰუმანიდი” არ შეასრულებს ვალდებულებებს, საპარტნიორო ფონდისთვის ეს არ არის პრობლემა, რადგან გვაქვს საკმაოდ მყარი გარანტიები.

დაგეგმილია საქართველოში ფარმაცევტული ქარხნის მშენებლობა, შერჩეულია ტერიტორიაც. სწორედ “ჰუმანიდის” დამსახურებაა ისიც, რომ ზაფხულში ქართულ ფარმაცევტულ ბაზარზე 300-მდე დასახელების მედიკამენტი გაჩნდა და ეს რეალურ ფასებთან შედარებით, 30% დაბალი იყო, რაც ჩვენი მოსახლეობისთვის გარკვეული შეღავათი იყო, ეს არის გარკვეული კონკურენცია და ბაზარი უნდა იყოს კონკურენტუნარიანი, ამიტომ გაუგებარია ფარმაცევტული საწარმოების მიერ ატეხილი აჟიოტაჟი.“- განაცხადა დავით საგანელიძემ.

საგანელიძე „ჰუმანიდში“ მისი ნათესავის მუშაობის ირგვლივ გავრცელებულ ინფორმაციასაც ეხმაურება. საგანელიძე აცხადებს, რომ მისი ნათესავი გიორგი საგანელიძე აღნიშნულ თანამდებობაზე, მის საპარტნიორო ფონდში მისვლმდეც მუშაობდა.

“გიორგიმ დაიწყო მუშაობა ჩემ მისვლამდე 2 წლით ადრე, ამ ადამიანს ეკავა ერთ-ერთი დირექტორის მოადგილის თანამდებობა, ასევე არის კარგი თარჯიმანი და ნეპოტიზმი ამ საკითხთან დაკავშირებით რა შუაშია, ჩემთვის გაუგებარია,“ – განაცხადა დავით საგანელიძემ.