"გიგა ბოკერიამ კობა ხაბაზსს ფეისბუქპოსტის გამო საქმე გაურჩია"

"გიგა ბოკერიამ კობა ხაბაზსს ფეისბუქპოსტის გამო საქმე გაურჩია" - ენმ-ში დაპირისპირება გრძელდება

პოლიტიკა - 10:37, 14 Dec, 2016

8738

”ნაციონალური მოძრაობის” ლიდერებს შორის დაწყებულმა შიდა უთანხმოებამ სოციალურ ქსელში გადაინაცვლა.

გუშინ ენმ-ს წევრმა, ჩიორა თაქთაქიშვილმა სოციალურ ქსელში დაწერა, რომ პარტიის მმართველმა გუნდმა პარტიის რამდენიმე წევრი შეამცირა.

„ნაციონალური მოძრაობის“ მმართველმა გუნდმა პარტიის რამდენიმე წევრი, მათ შორის კობა ხაბაზი და გოგა ონიანი „შემცირებაში მოაყოლა“ - დაწერა თაქთაქიშვილმა.

მისი თქმით, აღნიშნული პირები ღიად გამოთქვამდნენ პოზიციას და მხარს უჭერდნენ დიდი, 7 000-დელეგატიანი ყრილობის ჩატარებას.

თაქთაქიშვილის განცხადებას, სოციალურ ქსელშივე უპასუხა სერგო რატიანმა. ენმ-ს წევრი აცხადებს, რომ ”ნაციონალურმა მოძრაობამ” ცენტრალური ოფისიდან 20-მდე თანამშრომელი გაათავისუფლა.

რატიანის განცხადებით, ეს ადამისნები დაფინანსების 100 000 ლარით შემცირების გამო გაათავისუფლეს.

რამდენიმე წუთის წინ რატიანის აღნიშბულ განცხადებას ჩიორა თაქთაქიშვილის პასუხი მოჰყვა:

"სერგო, ძვირფასო!

პირველ რიგში: ჩემი სტატუსი ეხებოდა პარტიის არაფორმალურ მმართველს, რომლის დავალებითაც ეს ხალხი გაუშვი სამსახურიდან.
იქნებ, ტყუილია, რომ რეგიონული დეპარტამენტის თანამშრომლებს პირადად დაურეკე და პასუხი მოთხოვე, შენთან შეუთანხმებლად რატომ გამოხატეს საჯაროდ პოზიცია დიდი ყრილობის მხარდასაჭერად? ამის მერე რატომ გიკვირს, რომ ამ ადამიანების შემცირების მიზეზი სწორედ მათი პოზიცია მგონია და არა სხვა რამ?
ან იქნებ ის არის ტყუილი, რომ კობა ხაბაზი დაიბარე კაბინეტში, სადაც მას გიგა ბოკერია დაახვედრე, შენ გახვედი, გიგამ კი კობას საქმის გარჩევა დაუწყო ერთ-ერთი აქტივისტის ფეისბუქ პოსტის გამო (რომელიც საერთოდ არ იყო თავისუფალი ზონის წევრი) და ბოლოს დაემუქრა, პარტიაში თუ მოვა, ფიზიკურად გავუსწორდები და ხალხსაც ვაორგანიზებ ამისთვისო?!!!
ამ ყველაფრის მერე იქნებ მიზნების და საშუალებების შესაბამისობაზე საკუთარი თავისა და პარტიის არაფორმალური მმართველისთვის დაგესვა კითხვა. დამერწმუნე, საქმეს ეს უფრო გამოადგებოდა.
უმორჩილესად გთხოვ, გაასაჯაროოთ ყველა შემცირებული თანამშრომლის შესახებ ინფორმაცია, რომ ნათელი იყოს შემცირების მოტივები.
შტატების შემცირებამდე იქნებ ჩვენი აზრითაც დაინტერესებულიყავი, განგეხილა ხელფასების შემცირების ვარიანტიც, იქნებ ყველა თანახმა იყო ამაზე? მაგრამ მიზანი თუ არასასურველი ხალხის მოშორება და მათთან ანგარიშსწორება იყო, მაშინ გასაგებია ყველაფერი"- წერს თაქთაქიშვილი.