„ერთიანი ნაციონალური მოძრაობის“ რიგებში ლარის კურსთან დაკავშირებით კომენტარები კეთდება. პარტიის ერთ-ერთი ლიდერის დავით ბაქრაძის განცხადებით, მთავრობას არ შეუძლია ლარის დასტაბილურება და ეკონომიკის წინ წაყვანა:

„ახლა გამოქვეყნდა ლარის ახალი კურსი. ერთი დღის განმავლობაში, ლარის კურსის ხუთპუნქტიანი ვარდნა გვაქვს. ეს კურსის ძალიან სერიოზული ვარდნაა. წეღან მოვისმინეთ, რომ ეს არის მცურავი კურსი. მე შეიძლება ვთვლიდე, რომ თქვენ არ შეგიძლიათ ლარის დასტაბილურება, არ შეგიძლიათ ეკონომიკის წინ წაყვანა, ქვეყნის მართვა, მაგრამ ნამდვილად არ მჯერა, რომ ცურვა მაინც არ იცით.

ცურვა ნიშნავს იმას, რომ ზედაპირზე იმყოფებით და როდესაც მუდმივად ქვევით-ქვევით ეშვებით, ეს ცურვა აღარ არის. ეს მცურავი კურსი აღარ არის, ეს უკვე დამხრჩვალი კურსია. ამ მდგომარეობამდე ლარი თქვენ მიერ გატარებულმა ნაბიჯებმა მიიყვანა“, – განაცხადა დავით ბაქრაძემ.