„პატრიოტთა ალიანსის“ ლიდერისა და პარლამენტის ვიცე-სპიკერის ირმა ინაშვილის განცხადებით, სახელმწიფო საკონსტიტუციო კომისიასთან დაკავშირებით, მხარეებს შორის კინკლაობა უნდა დასრულდეს. მისი განცხადებით, საკონსტიტუციო ცვლილებების განხილვის ფორმატში ყველა უნდა იყოს ჩართული.

"საბავშვო ბაღი ხომ არ არის, რომ პრეზიდენტსა და პარლამენტს შორის, პრეზიდენტსა და მთავრობას შორის მუდმივი კინკლაობა იყოს? საჭიროა, ქვეყანა კრიზისულ ვითარებაში ვმართოთ, რაც ეხება პრეზიდენტსაც, პრემიერსაც და პარლამენტსაც. კინკლაობას თავი უნდა დავანებოთ. პრეზიდენტის ადმინისტრაციას საშუალება ჰქონდა ამ ფორმატში მონაწილეობა მიეღო. ცუდია, თუ მონაწილებას არ მიიღებენ, მაგრამ კარგია, რომ სახალხო განხილვად იქცეს ყველა ის საკითხი, რაც კომისიაზე გავა. ხალხი და საზოგადოება ამაში ჩართული უნდა იყოს. ეს ერთი-ორი ექსპერტის და ერთი პარტიის დონეზე არ უნდა გადაწყდეს", - განაცხადა ინაშვილმა.