ეროვნული ვალუტის გაუფასურების ტენდენცია გრძელდება. დოლარის ღირებულება დღეს ოფიციალურად 2.62 ლარია.

არსებულს სიტუაციაზე ექსპერტები კომენტარებს აკეთებენ. ანალიტიკოსები მდგომარეობის დარეგულირების ტენდენციისადმი სკეპტიკურად არიან განწყობილნი. ექსპერტების ნაწილი მიმდინარე პროცესებს ხელისუფლების მიერ წარმოდგენილ ეკონომიკურ გეგმას უკავშირებს.

"ლარის გაუფასურება დავაბრალოთ საგარეო ფაქტორებს, ეს არასერიოზული დამოკიდებულება იქნება. ამჯერად, მე მაინც ლარის გაუფასურების მიზეზებს ვხედავ იმ დაანონსებულ 10 პუნქტიან ზღაპრებში, რომელიც მთავრობამ წარმოადგინა. თავისთავად, როდესაც იმპორტიორ კომპანიას ეუბნები, რომ მას გაუძვირებ აქციზის გადასახადს, ის იწყებს მარაგების შექმნას, რაც ნიშნავს იმას, რომ უცხოურ ვალუტაზე მოთხოვნა იზრდება ბაზარზე,“ - განაცხადა ირაკლი ყიფიანმა.

ანალიტიკოსები ასევე ყურადღებას სეზონურ ფაქტორზეც ამახვილებენ და არასერიოზულად თვლიან მოსაზრებას, თითქოს ლარის კურსის ვარდნა გარე ფაქტორებს უკავშირება.

„თუ ეკონომიკური ზრდა არ იქნება, ლარი ვერ გამყარდება, თუმცა 10 პუნქტიანი გეგმის გაჟღერებამ ბაზრის არაორდინალური რეაქცია გამოიწვია, ბაზარს ეს არ ესიამოვნა. რაც შეეხება დღევანდელ გაუფასურებას, რომელიც მნიშვნელოვანი იყო, ალბათ არის უფრო სეზონური ფაქტორი,“ - აცხადებს ფინანსისტი ვასილ რევიშვილი.