საქართველოს პარლამენტში დღეს 2017 წლის მთავარი საფინანსო დოკუმენტის განხილვა დაიწყება. შეხვედრებს ფრაქციებთან ფინანსთა მინისტრი, დიმიტრი ქუმსიშვილი მართავს. პირველი შეხვედრა პატრიოტთა ალიანსთან არის ჩანიშნული:

„ეს ბიუჯეტი არ არის ორიენტირებული სოციალურ მიმართულებაზე, ღარიბ ფენაზე, სოციალურად დაუცველ ოჯახებზე, სამაგიეროდ ბიუჯეტი გვეუბნება, რომ 30 მილიონით უნდა იყოს დაფინანსებული მაგალითად ტურიზმი,“ - განაცხადა ირმა ინაშვილმა.

ოპოზიცია მწვავე კითხვებისთვის ემზადება, მათ შორის მთავრობის ეკონომიკურ გეგმასა და უწყებების ოპტიმიზაციაზე. ბიუჯეტის დამტკიცება ხვალ პლენარულ სხდომაზე იგეგმება, თუმცა ოპოზიცია მას მხარს არ დაუჭერს.

„როგორ შეიძლება ამ ბიუჯეტს დავუჭიროთ მხარი, როდესაც ვხედავთ, რომ ლარი მიიყვანეს გაუფასურების რეკორდულ ზღვრამდე,“ - აცხადებს პარლამენტის ფრაქციის ნაციონალური მოძრაობა - საქართველოს წინსვლისთვის წევრი რომან გოცირიძე.