პარლამენტის წევრებმა არასამთავრობო ორგანიზაციების წარმომადგენლებთან პირველი შეხვედრა გამართეს

პოლიტიკა - 15:59, 12 Dec, 2016

1512

ახალარჩეული პარლამენტის წევრებმა არასამთავრობო ორგანიზაციების წარმომადგენლებთან პირველი შეხვედრა გამართეს და თანამშრომობის შემდგომ გზებზე იმსჯელეს. შეხვედრის მონაწილეებს მისასალმებელი სიტყვით პარლამენტის თავმჯდომარემ, ირაკლი კობახიძემ და ფონდ „ღია საზოგადოება საქართველოს“ აღმასრულებელმა მდივანმა, ქეთევან ხუციშვილმა მიმართეს. თავის შესავალ სიტყვაში, საქართველოს პარლამენტის თავმჯდომარემ ისაუბრა სამომავლო საქმიანობის ძირითად მიმართულებებზე, კონკრეტულ ნაბიჯებზე და აღნიშნა, რომ ყველამ ერთად უნდა იმსჯელოს დასახული გეგმების განხორციელების გზებზე. პარლამენტის წევრების და არასამთავრობო ორგანიზაციების გაცნობითი ხასიათის შეხვედრა თემატური საკითხების განხილვით და სამოქალაქო სექტორის რეკომენდაციების გაცნობით გაგრძელდა. არასამთავრობო ორგანიზაციების წარმომადგენლებმა დარგობრივი მიმართულებებით ისაუბრეს და მათი საქმიანობის კომპეტენციის ფარგლებში ქვეყნის განვითარების და რეფორმირების კუთხით საკუთარი ხედვები წარმოადგინეს. შეხვედრაზე საუბარი შემდეგ მიმართულებებს შეეხო საარჩევნო სისტემის რეფორმას; დეცენტრალიზაცია და თვითმმართველობის რეფორმას; სასამართლო და მართლმსაჯულების სისტემის რეფორმას; სამართალდამცავი ორგანოების რეფორმას; თავდაცვისა და უსაფრთხოების სისტემას; უმცირესობათა უფლებების დაცვას; მედიისა და ინფორმაციის თავისუფლებას; სოციალურ უფლებებს; ასოცირების ხელშეკრულებას; და აღმასრულებელი ხელისუფლების საქმიანობაში პარლამენტის მონიტორინგს და მისს როლს. შეხვედრის დასასრულს ქეთევან ხუციშვილმა კმაყოფილება გამოთქვა აღნიშნული შეხვედრის გამართვისთვის და ღონისძიების ორგანიზებაში შეტანილი განსაკუთრებული წვლილისთვის პარლამენტის თავმჯდომარის პირველ მოადგილეს თამარ ჩუგოშვილს მადლობა გადაუხადა.