პარლამენტის თავმჯდომარის დადგენილებას საკონსტიტუციო კომისიის შექმნის შესახებ ბიუროს სხდომაზე ამ წუთებში განიხილავენ. საკანონმდებლო ორგანოში იმყოფება საქართველოს პრეზიდენტის საპარლამენტო მდივანიც.ანა დოლიძეს მმართველ გუნდთან და საქართველოს პარლამენტის თავმჯდომარესთან რამდენიმე კითხვა აქვს.

"ამ ეტაპზე ჩვენ კითხვა გვაქვს საკონსტიტუციო კომისიის შემადგენლობის ფორმირების ლოგიკასთან დაკავშირებით. თუ პრეზიდენტის თანათავმჯდომარეობა ან პრეზიდენტთან ამ კომისიის შექმნა არ მოხერხდა იმიტომ, რომ პრეზიდენტს არ აქვს საკანონმდებლო ინიციატივის უფლება, მაშინ რა ლოგიკით ხდება პრეზიდენტის ადმინისტრაციის წარმომადგენლების მოწვევა, იმიტომ, რომ ბუნებრივია, მათაც არ აქვთ საკანონმდებლო ინიციატივის უფლება.

თუ შემადგენლობის ფორმირება მოხდება იმ მანდატის მიხედვით, რომელიც ხალხმა მისცა გარკვეულ პარტიებს ან წარმომადგენლებს, ანუ ამომრჩეველთა ხმების მიხედვით, მაშინ საქართველოს პრეზიდენტს 2013 წელს აქვს მიღებული დაახლოებით 62%, შესაბამისად, უნდა ქონდეს უფლება მას შესაბამისი რაოდენობის ადამიანებით დააკომპლექტოს კომისია. დღეს დღეობით ჩვენი მთავარი ინტერესია გავიგოთ ის ლოგიკა, რომელსაც დაექვემდებარება კომისიის ფორმირება,“ - განაცხადა ანა დოლიძემ.