საკონსტიტუციო კომისიის შექმნის შესახებ პარლამენტის თავმჯდომარის დადგენილებას დღეს პარლამენტის ბიურო დაამტკიცებს, როგორც ცნობილია, კომისიას თავად ირაკლი კობახიძე უხელმძღვანელებს. აღნიშნულით „ართულმა ოცნებამ“ უარყო პრეზიდენტის ინიციატივა, რომლითაც თანათავმჯდომარეები უნდა ყოფილიყვნენ პრეზიდენტი, პრემიერი და პარლამენტის თავმჯდომარე.

ჯერჯერობით უცნობია ჩაერთვება თუ არა ამ ფორმატით საქმიანობაში პრეზიდენტის ადმინისტრაცია. საპარლამენტო უმცირესობის აზრით კვლავ გრძელდება პრეზიდენტის ინსტიტუტის დაკნინება.

პრეზიდენტის ადმინისტრაციისა და ოპოზიციის კრიტიკა გაუგებარია მმართველი გუნდისთვის.

„არსებობდა საკონსტიტუციო კომისია და არასდროს ყოფილა ის პრეზიდენტის ხელმძღვანელობით. საკანონმდებლო პროცესს მართავს საქართველოს პარლამენტი. ძალიან ნორმალური და ბუნებრივია, რომ სწორედ საქართველოს პარლამენტს ქონდეს წამყვანი როლი საკონსტიტუციო ცვლილებების შემუშავებაზე. არასდროს საქართველოში ეს საკითხი არ დამდგარა დღის წესრიგში, სრულიად გაუგებარია ახლა რატომ გახდა ეს თემა და რატომ მიიჩნევს ვიღაც, თითქოს ამით რამე კნინდება,“ - აცხადებს თამარ ჩუგოშვილი.