2017 წელს თბილისში საცობების კუთხით ვითარება კიდევ უფრო დამძიმდება

2017 წელს თბილისში საცობების კუთხით ვითარება კიდევ უფრო დამძიმდება - ენმ დედაქალაის ბიუჯეტზე

პოლიტიკა - 12:47, 12 Dec, 2016

3084

ოპოზიციის ინფორმაციით, თბილისის ბიუჯეტი 46 624 000 ლარით მცირდება. შესაბამისი განცხადება დღეს „ერთიანი ნაციონალური მოძრაობის“ წევრმა თამაზ შოშიაშვილმა გააკეთა.

„თბილისის ბიუჯეტი მცირდება 46 624 000 ლარით, მაშინ როდესაც ცენტრალური ბიუჯეტი იზრდება. დედაქალაქის მერიამ და „ქართული ოცნების“ ქალაქის მთავრობამ ვერ შეძლო თბილისელების ინტერესების დაცვა და შესაბამისი ტრანსფერის გამოთხოვა ცენტრალური ბიუჯეტიდან და დედაქალაქის მერია იძულებული გახდა, რომ შეამციროს თბილისის ბიუჯეტი“, - განაცხადა თამაზ შოშიაშვილმა.

მისივე თქმით, ბიუჯეტში, საგზაო ინფრასტრუქტურის მშენებლობა აღდგენისა და მოვლა-შეკეთების მუხლში არაფერი იცვლება, ხოლო გაზრდილია ტრანსპორტის განვითარების მუხლი 31 466 00 ლარით.

„არაფერი იცვლება საგზაო ინფრასტრუქტურის მშენებლობის აღდგენისა და მოვლა-შეკეთების მუხლში. ეს გახლავთ 35 400 000 ლარით წარმოდგენილი, როგორც იყო 2016 წლის განმავლობაში, რაც იმას ნიშნავს, რომ დედაქალაქის მერიამ 2016 წელს რაც გააკეთა საცობების განტვირთვის კუთხით და კომფორტულად გადაადგილების მოწესრიგების თვალსაზრისით, იგივე გაკეთდება 2017 წლის განმავლობაში, ანუ უფრო დამძიმებულ მდგომარეობას მივიღებთ თბილისში საცობების კუთხით..." - განაცხადა თამაზ შოშიაშვილმა.

ენმ-ს წევრის თქმით, დედაქალაქის მუნიციპალური ტრანსპორტის, ავტობუსების მხოლოდ 20%-ის ჩანაცვლება მოხდება, რაც სატრანსპორტო სისტემის მოწესრიგების კუთხით მდგომარეობას არ შეცვლის.