„ჯანდაბა ამ ყველაფერს, მე კარგი ამბავიც მაქვს მეგობრებო - ასე დიდხანს ვერ გაგრძელდება. ვერ გაგრძელდება რადგან სამყარო სიცარიელეს ვერ იტანს“ - წერს დავით დეფი და დღევანდელ რეალობასთან დაკავშირებით სოციალურ ქსელში შემდეგ პოსტს აქვეყნებს.

დავით დეფი: ახლა ვუყურებ ქუჩებს, ადამიანებს ამ ქუჩებში და ვფიქრობ - სიმართლე ადვილად და სწრაფად რომ ვრცელდებოდეს ის სიმართლე აღარ იქნებოდა, ის ჭორი იქნებოდა.

სიმართლის ბუნება უცნაური რამაა. ის ყოველთვის განგებ აგვიანებს. თითქოს ადამიანებს აკვირდება, ვინ როგორ იქცევა, ვინ როგორ მეტყველებს სანამ ის გამოჩნდება - ბოლოს კი, როცა სიმართლე მჟღავნდება და ყველაფერი თავის ადგილზეა, საოცარი დრო დგება, სიჩუმის დრო. თუმცა ცოტა ხნით. მერე ისევ ყაყანია. ისევ ჭორები და თავბრუსხვევა. ზუსტად ასეა ახლა - მთელი ქვეყანა თავბრუდახვეულია.

ყველაფრით თავბრუდახვეულია - გაძვირებითა თუ გაუფასურებით, იმედითა თუ უიმედობით, განხეთქილებით თუ პირდაპირი ღალატით თუ ლანძღვა-გინებითა და ცინიზმით, ეკლესიით, პოლიტიკით, კრიმინალით, საზოგადოებით, ტელევიზიით, ინტერნეტით, არჩევნებით აქ თუ იქ, მომავლითა და აწმყოთი, წიგნის ბაზრობებითა თუ უწიგნურობით, სამსახურებით თუ უმუშევრობით, მეძავობით თუ უმანკოებით, მათხოვრობითა თუ მფლანგველობით, უმეცრებითა თუ სიბრძნით, ტყუილითა და ჭორით და ჩიხში დგომით. სახით კედელთან. უხმოდ.

მე მხოლოდ მინდა ვიცოდე, სიმართლე ჩქარა რა მიზეზით არ ვრცელდება? სიმართლის სიჩქარით რომ გვევლო ახლა სად ვიქნებოდით? რამდენია სიმართლის სიჩქარე? ისტორიის შავ ხვრელებში როგორ იკარგება ის და თუ აქედან გააღწევს ან აქ შემოაღწევს, მერე სად მიდის?

შესაძლოა და თანაც მალე, ამ ქვეყანაში ბევრმა რამემ, ცნებამ თუ მცნებამ, არსებობა შეწყვეტოს და მათ შორის, ამ არსებობაშეწყვეტილ ამბებს შორის სიმართლე და მისი სიცოცხლე, ვფიქრობ უპირველესია. მხოლოდ ის გვანიჭებს ძალას და როცა ის არ არის ყველა და ყველაფერი უძლურია. სუსტია და გაყუჩებული. არსის გარეშე გამოფიტული. უშინაარსო.

ჩემთვის სიმართლე სიცოცხლეა. თვითონ სიცოცხლე და არა არსებობა. არსებობს ბევრი რამ, მაგრამ არ ცოცხლობს. სიმართლის გარეშე ყოფნის ამბავი კმაყოფილად მოწყენილი, დაშტერებულად უსუსური ყოფის ამბავია. ამბავი ცარიელი ქუჩებით და ცარიელი ადამიანებით ამ ქუჩებში. ყველა ჩქარა მიდის, მაგრამ არავინ არსად.

ჯანდაბა ამ ყველაფერს, მე კარგი ამბავიც მაქვს მეგობრებო - ასე დიდხანს ვერ გაგრძელდება. ვერ გაგრძელდება რადგან სამყარო სიცარიელეს ვერ იტანს და რადგან:

ერთი მთლიანი ჩვენს წინ გასამდა. ის უსასრულოდ განისრულება. რადგან სიცოცხლის ნების თანახმად, სუნთქვის არსია თავისუფლება.

დ♔სიახLOVE
6 დეკემბერი 2016