"სააკაშვილის, მერაბიშვილის და ადეიშვილის ბრძანებით გაკეთდა ყველაფერი"- აბდალაძე

პოლიტიკა - 16:08, 06 Dec, 2016

8409

ფოტოგრაფი გიორგი აბდალაძე ე.წ ფოტოგრაფების საქმეზე პროკურატურის განცხადებას "ნიუპოსტთან" აფასებს. ყოფილი პატიმარი აცხადებს, რომ შოთაძის უწყების განცხადებამ მათ იმედი გაუჩინა.

"გამოძიებამ მაქსიმალურად ყველაფერი გააკეთა რომ დაედგინა თუ როგორ და რა მიმართულებით ხდებოდა ზეწოლა ჩვენზე. მადლობას ვუხდით პროკურატურას და ყველა იმ ადამიანს, ყველა იმ ჟურნალისტს ვინც წლების განმავლობაში გვერდში გვედგა. თავის დროზე რომ არა ჟურნალისტების პროტესტი, ჩვენი საქმე როგორ დამთავრდებოდა კაცმა არ იცის. საქმეს გრიფი აეხსნა, პროკურატურამ დაზარალებულად გვცნო და დღეს ჩვენ იმედი მოგვეცა"- განუცხადა "ნიუპოსტს" აბდალაძემ.

მისი თქმით, გამოძიება პარალელურ რეჟიმში მიმდინარეობს.

"ერთი - რა მეთოდებით და როგორ ხდებოდა და მეორე ვინ გასცა ბრძანება, ეს უკვე შემდეგი ეტაპია. იმედი გვაქვს სასამართლო გაითვალისწინებს ამ ყველაფერს და გაგვამართლებენ. წინა ხელისუფლების დროს უდანაშაულო ადამიანები ვიყავით ციხეში"- აღნიშნა ფოტოგრაფმა.

აბდალაძის განცხადებით, მათი დაკავების ბრძანებას ყოფილი მაღალჩინოისნების გარდა ვერავინ გასცემდა.

"მიხეილ სააკაშვილის ბრძანების გარეშე, ვანო მერაბიშვილისა და ადეიშვილის გარეშე და მაშინდელი ხელისუფლების მაღალი რანგის წარმომადგენლობის გარეშე ამ უკანონო ბრძანებას არავინ შეასრულებდა. მათი ბრძანებით იყო ყველაფერი გაკეთებული"- უთხრა "ნიუპოსტს" აბდალაძემ.

დღეს საქართველოს მთავარმა პროკურატურამ ე.წ. ფოტოგრაფების საქმეზე განცხადება გააკეთა. უწყების ცნობით, შსს-ს კონტრდაზვერვის თბილისის სამმართველოს უფროსის ყოფილი მოადგილე დავით დევნოზაშვილი დააკავა.