მანუელ ვალსი საფრანგეთის პრეზიდენტობისთვის იბრძოლებს

მანუელ ვალსი საფრანგეთის პრეზიდენტობისთვის იბრძოლებს - პრემიერმა თანამდებობა დატოვა

პოლიტიკა - 14:58, 06 Dec, 2016

1495

საფრანგეთის პრემიერ მინისტრმა მანუელ ვალსმა თავისი კანდიდატურა ოფიციალურად წამოაყენა „სოციალისტურ პარტიის“ საპრეზიდენტო პრაიმერიზში, რომელიც იანვარში გაიმართება.

„მე რესპუბლიკის პრეზიდენტობის კანდიდატი ვარ“- განაცხადა ვალსმა, რომელიმაც მთავრობის ხელმძღვანელის თანამდებობა დღეს დატოვა.

პრეზიდენტი ფრანსუა ოლანდი, რომელიც ასევე სოციალისტური პარტიის წევრია, მეორე ვადით პრეზიდენტობისთვის ბრძოლას არ აპირებს. მიზეზად კი მისი კანდიდატურის მიმართ მოსახლეობის არასაკმარისი მხარდაჭერა სახელდება.

მანუელ ვალსი ხელისუფლებაში 2012 წლიდან არის, ის 2 წელი საფრანგეთის შინაგან საქმეთა სამინისტროს ხელმძღვანელობდა, რის შემდეგაც საფრანგეთის მთავრობას ჩაუდგა სათავეში. ის ცნობილია, როგორც არალეგალური იმიგრაციის მკვეთრი მოწინააღმდეგე, თავად კი ესპანეთშია დაბადებული კატალონიელი მხატვრის ოჯახში, საფრანგეთის მოქალაქეობა 1982 წელს მიიღო, 20 წლის ასაკში.

საპრეზიდენტო არჩევნებში მთავარ კანდიდატებად კონსერვატორი ფრანსუა ფიიონი ითვლება, რომელიც პრემიერის თანამდებობას ნიკოლა სარკოზის პრეზიდენტობის დროს იკავებდა და „ნაციონალური ფრონტის“ ლიდერი მარინ ლე პენი.