თბილისში საახალწლო ღონისძიებებისთვის მილიონ 487 ათასი ლარი დაიხარჯება

პოლიტიკა - 13:03, 06 Dec, 2016

7993

თბილისში საახალწლო ღონისძიებებისთვის მერიის საერთო ბიუჯეტიდან მილიონ 487 ათასი ლარი დაიხარჯება. როგორც მერიის კულტურის საქალაქო სამსახურის უფროსმა ია მაქაცარიამ განაცხადა საახალწლო გალა კონცერტისთვის, რომელიც "ვარდების მოედანზე" 31 დეკემბრის ღამეს გაიმართება, დედაქალაქის ბიუჯეტიდან 227 ათასი ლარი გამოიყოფა.

,,ეს არის ჯამური ბიუჯეტი, რომელშიც შედის კულტურის სამსახური, სპორტის სამსახური, კეთილმოწყობა, ადმინისტრაცია და პიარი. რაც შეეხება გალა კონცერტს, მისი ბიუჯეტი არის 227 ათასი ლარი“, - განაცხადა ია მაქაცარიამ.

საახალწლო ღონისძიების დეტალებზე ისაუბრა დღეს დავით ნარმანიამ თბილისის მერიაში გამართულ მთავრობის სხდომაზე.

მისი განცხადებით, წელს საახალწლო ღონისძიებებთან დაკავშირებით ქუჩები არ გადაიკეტება.

„ეპიცენტრი საახალწლო ღონისძიებების იქნება „დედაენის ბაღში“ და განახლებულ აღმაშენებელზე. „დედაენის ბაღში“ 25 დეკემბრიდან იხსნება საახალწლო ქალაქი, სადაც ბევრი საინტერესო კულტურული ღონისძიება მოეწყობა. საახალწლო ღონისძიებებით დატვირთული იქნება განახლებული აღმაშენებლის გამზირიც. რაც შეეხება 31 დეკემბრის გალა კონცერტს, ის რესპუბლიკის მოედანზე გაიმართება“, - განაცხადა დავით ნარმანიამ.

რაც შეეხება საახალწლო ილუმინაციებს, თბილისის მერის თქმით, წელს პეკინის ქუჩა, აეროპორტის ტრასა და აღმაშენებლის გამზირი საახალწლოდ ახალი დიზაინით მოირთვება.