საქართველოს სახელმწიფო ბიუჯეტის 2017 წლის პროექტს დღეს პარლამენტის ბიუროს სხდომაზე განიხილავენ, დეპუტატები დოკუმენტზე მსჯელობის ვადებსა და ფორმატზე უნდა შეთანხმდნენ.

ბიუჯეტის საბოლოო პროექტი თანმდევ საკანონმდებლო ცვლილებებთან ერთად პარლამენტს 30 ნოემბერს წარედგინა. პროექტის მიხედვით, 65 მილიონი ლარი იმ ფიზიკურ პირებზე გამოიყოფა, რომლებმაც საბანკო სესხები უცხოურ ვალუტაში აიღეს და მისი ეროვნულ ვალუტაში კონვერტირება გადაწყვიტეს.

2017 წლიდან დაგეგმილია აქციზის გადასახადის გაზრდა თამბაქოს ნაწარმზე, ავტომობილებსა და ნავთობპროდუქტებზე. იგეგმება ზოგიერთი საბიუჯეტო ორგანიზაციის გაუქმება ან ბიუჯეტიდან დაფინანსების შეწყვეტა. მათ შორის გაუქმდება ეკონომიკური საბჭოს აპარატი და საინვესტიციო სააგენტო.

ბიუჯეტიდან აღარ დაფინანსდება დაზღვევის ზედამხედველობის სააგენტო. მნიშვნელოვნად შემცირდება სახელმწიფო უსაფრთხოებისა და კრიზისების მართვის საბჭოს აპარატის დაფინანსება.

პარლამენტის თავმჯდომარის თქმით, პროექტში მნიშვნელოვნად არის შემცირებული ადმინისტრაციული ხარჯები, რაც დადებითად იმოქმედებს ლარის კურსზე.

„ადმინისტრაციული ხარჯების შემცირება იყო ერთ-ერთი დაანონსებული ცვლილება, რაც ასახულია ბიუჯეტის პროექტში. ამ ცვლილების განხორციელება აუცილებელია იმისათვის, რომ ჩვენ შევინარჩუნოთ სტაბილური გარემო, მათ შორის ამ ხარჯების ცვლილება აისახება დადებითად ლარის კურსზე.“ - აღნიშნა ირაკლი კობახიძემ.

საპარლამენტო უმცირესობის შეფასებით კი მთავრობის შემუშავებული ბიუჯეტი მოსახლეობის გაღარიბებისკენ არის მიმართული.

„ეს არის გაღარიბების ბიუჯეტი, რადგან ეკონომიკიდან ხალხის ჯიბიდან ამოიღებს უფრო მეტ თანხას, ვიდრე შეიძლებოდა ამოეღო მთავრობას და ეს ხდება გადასახადების გაზრდის გამო. ადმინისტრაციული ხარჯის შეკვეცის რესურსი, რომელიც ჩვენი დათვლებით, 600-700 მილიონი ლარი ყოფილიყო, ეს ასე არ არის, სამაგიეროდ, გაზრდილია ხარჯები უყაირათო სამთავრობო პროგრამებში." - განაცხადა ზურაბ ჭიაბერაშვილმა.