"მთავრობა პრობლემას არ აღიარებს, გაუფასურების პროცესი გაგრძელდება"

"მთავრობა პრობლემას არ აღიარებს, გაუფასურების პროცესი გაგრძელდება" - ენმ ლარის რეკორდულ ვარდნაზე

პოლიტიკა - 15:12, 01 Dec, 2016

2955

"ნაციონალური მოძრაობის" წევრების განცხადებით, ლარის გაუფასურებასთან დაკავშირებით საქართველოს ხელისუფლებას არავითარი გეგმა არა აქვს.

ოთარ კახიძის განცხადებით, ქვეყანში ეკონომიკა და ექსპორტი მცირდება, რასაც შესაბამისად ლარის გაუფასურებას იწვევს.
,,საქართველოს მთავრობამ ეროვნულ ბანკს 18 მილიონი დოლარი საარჩევნო მიზნებისთვის ჩვენი რეზერვიდან დაახარჯინა. ეს იმისთვის, რომ წინასაარჩევნოდ არ გაუფასურებულიყო ლარი. იმის გამო, რომ მათი პოლიტიკა არის უუნარო და ეკონომიკა და ექსპორტი მცირდება, ასევე ქვეყანაში არ შემოდის ფულადი შემონატანები, მთავრობა არაფერს არ აკეთებს ამის მოსაგვარებლად. ლარი უფასურდება ჩვენი მოქალაქეებისთვის. ეს პროცესი კიდევ გაგრძელდება, რადგან მთავრობას არა აქვს არანაირი გეგმა, თუ როგორ უნდა გამოვიდეს ამ მდგომარეობიდან. ისინი არც კი აღიარებენ, რომ პრობლემა არის მათ პოლიტიკაში“, - განაცხადა ოთარ კახიძემ.

ლარის რეკორდული გაუფასურების შესახებ განცხადება გააკეთა სერგი კაპანაძემაც. რომელიც გამოსავალს ბიუროკრატიული ხარჯების შემცირებაში ხედავს.

„უნდა ადგნენ და მარტივად მაქსიმალურად შეკვეცონ ბიუროკრატიული ხარჯები ბიუჯეტში. ყველაფერი უნდა გააკეთონ, რომ შემოვიდნენ ინვესტორები. ის რაც ამათ დაანონსეს რამდენიმე დღის წინ არის აბსოლუტურად კონტრპროდუქტიული და უკუშედეგს იწვევს, რადგან ამას უკვე მოჰყვა პანიკა ბაზარზე,“- განაცხადა ენმ-ს ერთ-ერთმა ლიდერმა სერგი კაპანაძემ.

ცნობისთვის, ზოგიერთ კომერციულ ბანკში ერთი დოლარის ღირებულებამ 2.73 ლარს მიაღწია.

საქართველოს ეროვნული ბანკის მიერ დადგენილი კურსის თანახმად, ლარი დოლართან მიმართებაში ისევ გაუფასურდა. კერძოდ, ერთი დოლარის ოფიციალური ღირებულება 2.5352 ლარია.