"საარჩევნო სისტემა რაც უფრო პროპორციულია, მით უკეთესია"- ირაკლი კობახიძე

პოლიტიკა - 22:51, 29 Nov, 2016

1850

საქართველოს პარლამენტის თავმჯდომარემ გადაცემა „არჩევანში“ საარჩევნო კოდექსის ცვლილებასა და მაჟორიტარული სისტემის გაუქმების შესაძლებლობაზე ისაუუბრა. ირაკლი კობახიძის განცხადებით მსგავს მნიშვნელოვან ცვლილებებზე მსჯელობა სუფთა ფურცლიდან უნდა დაიწყოს, მას შემდეგ რაც შეიქმნება საკონსტიტუციო კომისიის ფორმატი, რომელშიც წარმოდგენილი იქნება აღნიშნული საკითხით დაინტერესებული ყველა სუბიექტი.

„ჩვენ მზად ვართ ყველანაირი დისკუსიისთვის. თუ საარჩევნო სისტემაში განხორციელდება ცვლილებები, ეს ცვლილებები დაეფუძნება ობიექტურ კრიტერიუმებს.“- განაცხადა კობახიძემ. პარლამენტის თავმჯდომარის თქმით არსებულ სისტემასთან დაკავშირებით აქცენტი კეთდება დისპროპორციაზე თუმცა, მისი თქმით დისპროპორცია ავტომატურად უსამართლობას არ ნიშნავს.

„არსებობს სისტემები, სადაც პროპორციულად არ არის ასახული მანდატების გადანაწილებაში საარჩევნო ხმები, თუმცა ეს სისტემები მოქმედებს განვითარებულ ქვეყნებში და უსამართლოდ არ ითვლება. მაგალითისთვის შეგვიძლია აშშ-ს არჩევნები მოვიყვანოთ, იაპონიაში ზუსტად იგივე სისტემა მოქმედებს, როგორიც საქართველოში. თუმცა ჩემი პირადი მოსაზრებაა, რომ რაც უფრო პროპორციულია მით უკეთესია პოლიტიკური სისტემის განვითარებისთვის“- განაცხადა კობახიძემ.

კობახიძის თქმით პროპორციულ სისტემას თავისი რისკებიც გააჩნია, ასეთად პარლამენტის თავმჯდომარემ სტაბილური უმრავლესობის ჩამოყალიბების პრობლემა დაასახელა.