ეროვნულმა ბანკმა ლარის ახალი კურსი დაადგინა - ერთი ამერიკული დოლარი დღეის მონაცემებით 2.5311 ლარი ღირს. დღეს გამართულ მთავრობის სხდომაზე საქართველოს პრემიერ-მინისტრმა მთავრობის სამომავლო გეგმებზე ისაუბრა ქვეყანაში შექმნილი ეკონომიკური სიტუაციის გამოსწორებასთან მიმართებით.

საზოგადოება და ბანკების გამგეობის თავმჯდომარე, გიორგი კეპულაძე „ნიუპოსტთან“ საუბრისას აცხადებს, რომ დოლარიზაციის პროცესში ხელოვნური ჩარევა კარგი შედეგის მომტანი არ არის:

„ზოგადად ხელოვნური ჩარევა დოლარიზაციის პროცესში არ არის კარგი შედეგეის მომტანი, ამის მაგალითი არსებობს მსოფლიოს ეკონომიკის ისტორიაში. დღეს მთავრობა რაზეც საუბრობს, გასარკვევი იქნება დეტალები, კონკრეტულად რა პირობები იქნება, ბანკები რა პირობებს შესთავაზებენ, ეს მოხდება მთავრობის ჩარევით, ეროვნული ბანკის დავალებით თუ საბაზრო კონკურენციის შედეგად ჩამოყალიბდება საპროცენტო განაკვეთი ლარში. ძალიან ბევრი კითხვის ნიშანი ჩნდება.

რეალურად გადასახადის გადამხდელების ფულით მოხდება იმ ხალხის გასტუმრება, ვისაც იპოტეკური სესხი დოლარში აქვს. ანუ სესხის ლარში გადატანა უნდა დააფინანსონ იმ ადამიანებმა რომლებიც გადასახადებს იხდიან და თვითონ სულაც არ აქვთ არავითარი სესხი, ეს რამდენად სამართლიანია ვერ ვიტყვი. უნდა დაველოდოთ კონკრეტულად რას შესთავაზებს მთავრობა როგორც ეროვნულ ბანკს, ასევე საბანკო სექტორს და მომხმარებლებს. ეს შეთავაზებები თუ პრობლემებს შეუქმნის საბანკო სექტორს, ეს მხოლოდ საბანკო სექტორის პრობლემები არ იქნება, ეს იქნება პრობლემა ეკონომიკისთვის“, - განაცხადა გიორგი კეპულაძემ.