მწვანე ტექნოლოგიებისა და ინოვაციების დღე

პოლიტიკა - 16:54, 29 Nov, 2016

644

ტექნოპარკში მწვანე ტექნოლოგიებისა და ინოვაციების დღე აღინიშნა. კავკასიის გარემოსდაცვითი არასამთავრობო ორგანიზაციების ქსელმა (CENN) კავკასიაში პირველი გარემოსდაცვითი ცოდნის პორტალი, მწვანე მობილური აპლიკაცია GreenWatch და ელექტრონული თამაში –„დაახარისხე და გადაამუშავე“ წარმოადგინეს. შეხვედრის მონაწილეებს გარემოსა და ბუნებრივი რესურსების დაცვის მინისტრის მოადგილემ ეკატერინე გრიგალავამ და თბილისის მერმა დავით ნარმანიამ მიმართეს.

მობილური აპლიკაცია GreenWatch საშუალებას აძლევს მომხმარებელს, გადაიღოს გარემოსდაცვითი პრობლემის ამსახველი ფოტო და გამოგზავნოს შემდგომი რეაგირების მიზნით. აპლიკაციაში შემოსული განაცხადები გადამისამართდება პასუხისმგებელ უწყებებთან, რომლებიც დაეხმარებიან საზოგადოებას პრობლემის მოგვარებაში. GreenWatch შექმნილია გარემოსა და ბუნებრივი რესურსების დაცვის სამინისტროსა და თბილისის მუნიციპალიტეტის მერიასთან თანამშრომლობით, CENN- ის მიერ, დონორთა ფინანსური მხარდაჭერით.

ელექტრონული საგანმანათლებლო თამაში „დაახარისხე და გადაამუშავე“ ნარჩენების სეპარირებისა და გადამუშავების საკითხებზე საზოგადოების ცნობიერების ამაღლების მიზნით შეიქმნა, რომელიც განკუთვნილია 6 წლის და უფრო დიდი ასაკის ბავშვებისათვის. თამაშის მიზანია დაეხმაროს ახალგაზრდა თაობას გააცნობიეროს, რომ ყველა ნარჩენი ნაგავი არაა და რომ ნარჩენების დახარისხებითა და შემდგომ გადამუშავებით სასარგებლო ნივთების დამზადებაა შესაძლებელი. ნარჩენების გადამუშავებით ჩვენ ვზრუნავთ გარემოზე, რადგან ვზოგავთ ბუნებრივ რესურსებს. თამაში შექმნილია CENN–ის ინიციატივით, USAID-ის ფინანსური მხარდაჭერით მიმდინარე პროგრამის "ნარჩენების მართვის ტექნოლოგიები რეგიონებში" ფარგლებში, GeoLab-ის მეირ.

შეხევედრას განათლების სამინისტროს წარმომადგენლებთან ერთად, სხვადასხვა რეგიონის საჯარო სკოლების მოსწავლეები ესწრებოდნენ.