ოკუპაციის შესახებ კანონში ცვლილებას ეწინააღმდეგება „ერთიანი ნაციონალური მოძრაობის“ წევრი სერგი კაპანაძე. მისი თქმით არ არსერბობს არანაირი დასაბუთება, რისთვის არის ეს ცვლილებები საჭირო. კაპანაძის განმარტებით, კანონი ისედაც არ ზღუდავს ოკუპირებულ ტერიტორიებზე იმ საქმიანობის განხორციელებას, რომელიც საქართველოს ინტერესებთან თანხვედრაშია. როგორც კაპანაძე აღნიშნავს, არგუმენტი რომ ოკუპაციის შესახებ კანონის გარკვეულწილად ლიბერალიზაციას ევროსტრუქტურები ითხოვენ არასწორია, რადგან არცერთ ფორმალურ მოთხოვნაში ევროკავშირის მხრიდან ეს არ ყოფილა:

„ოკუპაციის კანონი არ საჭიროებს ცვლილებებს, იქ რაც წერია ის იძლევა საშუალებებს, რომ ნებისმიერი საქმიანობა, რაც ჩვენი ინტერესების თანხვედრაშია იყოს იქ განხორციელებული, ამიტომ ვერანაირ საჭიროებას ამაში ვერ ვხედავ. გარდა ამისა , არანაირი დასაბუთება იმასთან დაკავშირებით, რატომ არის კონკრეტული ცვლილება საჭირო წარმოდგენილი არ არის. ამაზე მუშაობა ბუნებრივია გაგრძელდება და ვნახავთ თუ ექნებათ რაიმე უკეთესი დასაბუთება. შეცვლა შეცვლის გულისთვის, როდესაც რაიმე უფრო მნიშვნელოვანი მიზანი არ არის შესრულებული, ჩვენი აზრით არის სრულიად მიზანშეუწონელი. არანაირი სანქციები ამასთან დაკავშირებით არ ყოფილა და არცერთ ფორმალურ მოთხოვნაში ევროკავშირის მხრიდან ეს არ ყოფილა. თუკი რომელიმე კონკრეტული ადამიანი, ევროკავშირის წარმომადგენელი ამას ითხოვს. მასთან ძალიან მარტივად შეიძლება დასაბუთება და ახსნა, რატომ არაა ეს ცვლილებები საჭირო“- განაცხადა სერგი კაპანაძემ.