როგორც იქნა მიხვდით, რომ აღმაშენებლის გამზირის რეაბილიტაცია უნდა გაგეგრძელებინათ

როგორც იქნა მიხვდით, რომ აღმაშენებლის გამზირის რეაბილიტაცია უნდა გაგეგრძელებინათ - ბობოხიძე

პოლიტიკა - 21:29, 26 Nov, 2016

9564

ერთიანი ნაციონალური მოძრაობის დეპუტატმა აკაკი ბობოხიძემ უმრავლესობის წევრებსა და სამთავრობო გუნდს მიმართა და მოუწოდა, რომ სხვადასხვა ინფრასტრუქტურული თუ ტურისტული პროექტები ვინმეს ჯიბრით არ უნდა გააჩერონ.

”4 წელია გეხვეწებოდით, რომ ჯერ არ გაგეჩერებინათ და შემდეგ ინტენსიურად გაგეგრეძელებინათ კარწახი-ახალქალაქის რკინიგზა. 4 წლის განმავლობაში გეხვეწებოდით, რომ დაბრუნებოდით თბილისის შემოვლით რკინიგზას. გეხვეწებოდით რომ მესტია - ლენტეხის შემაერთებელი გვირაბი სჭირდება იმ სფეროს განვითარებას, რომლითაც თქვენ ამაყობთ - ტურიზმს

სხვათა შორის ტურიზმის განვითარებაში თქვენ არ მიგიძღვით წვლილი, იმიტომ რომ ტურისტები ჩამოდიან ან ღმერთის ბოძებული ბუნების სანახავად, ან ჩვენი წინაპრების აშენებული ეკლესიების და კულტურის ძეგლების სანახავად, ან კიდევ 99 პროცენტით მიხეილ სააკაშვილის და წინა ხელისუფლების დროს გაკეთებული ტურისტული ობიექტების სანახავად. ასე რომ, თქვენი დამსახურება ამაში რა არის ვერ ვხვდები.

გეხვეწებოდით, რომ სატრანზიტო ფუნქციის მქონე ქვეყანაში არ უნდა მიმდინარეობდეს ნელი ტემპით ავტობანის მშენებლობა. 4 წლის განმავლობაში გეხვეწებოდით, რომ ისეთი საოცარი კურორტი, როგორიც არის წყალტუბო იქნას გამოყენებული. დღეს მადლობლები ვართ რომ როგორც იქნა მიხვდით, რომ ამ პროექტებს უნდა დაბრუნებოდით.

როგორც იქნა მიხვდით, რომ აღმაშენებლის გამზირის რეაბილიტაცია უნდა გაგეგრძელებინათ, კარგია თუ მიხვდით, რომ ვინმეს ჯინაზე პროექტები არ უნდა გააჩეროთ. მაგრამ ამის შესმენა არ გინდოდათ და პასუხი იყო, რომ თქვენ ლაპარაკის უფლება არ გაქვთ." - განაცხადა ბობოხიძემ.