გადაიხედება თუ არა ოკუპაციის შესახებ კანონი - ,,ხელისუფლებას სურს უთხრას რუსეთს, ,,ჩვენ კარგად ვიქცევით“

პოლიტიკა - 16:21, 26 Nov, 2016

3200

გადაიხედება თუ არა კიდევ ერთხელ ოკუპაციის შესახებ კანონი. ცვლილებების შესახებ განცხადება საქართველოს სახალხო დამცველმა გააკეთა. უჩა ნანუაშვილი ოკუპაციის შესახებ კანონის გადახედვის უაცილებლობაზე საუბრობს და აცხადებს, სახალხო დამცველის აპარატი კანონში ცვლილებების შეტანის რეკომენდაციაზეც იწყებს მუშაობას.

რა შედეგის მიღწევას ცდილობს ხელისუფლება კანონის ლიბერალიზაციით - ,,ნიუპოსტი“ ჯიპა-ს პროფესორს, ექსპერტ თორნიკე შარაშენიძეს ესაუბრა. ექსპერტი მიიჩნევს, რომ მიზანი რუსეთის ინტერესებთან დაახლოებაა.

,,ამ ხელისუფლებამ ოკუპაციის შესახებ კანონს ერთხელ უკვე გადახედა, გაუადვილეს და შეღავათები მისცეს იმათ, ვიზეც იყო დაჭერის საფრთხე საზღვრის გადმოკვეთის გამო. ეს ნაწილი გააუქმეს. არ მგონია რომ ეს ომბუდსმენის ინიციატივა იყოს, კიდევ ერთხელ სურთ, რუსეთს უთხრან, რომ ,,ჩვენ კარგად ვიქცევით“ - აცხადებს ექსპერტი.

შარაშენიძე ამბობს, რომ ოკუპაციის კანონი არ გაუქმდება, თუმცა მიიჩნევს, რომ საბოლოოდ მიიღებს იმ სახეს, რომ მის არსებობას რეალურად აზრი დაეკარგება.

,,კანონს ვერ გააუქმებენ, მაგრამ რაღაცეებს კიდევ შეარბილებენ. ბუნებრივია, ჩვენ არ ვაღიარებთ ოკუპირებულ ტერიტორიებს, დიპლომატიურ ურთიერთობას არ აღვადგენთ, მაგრამ მიზანი არის ის, რომ არ გავაღიზიანოთ რუსეთი, გამოვიყენოთ ბოლომდე და დავუახლობოთ მათ ინტერესებს. დიდი შანსია, საბოლოოდ მივიღოთ ის, რომ ოკუპაციის შესხებ კანონის არსებობას აზრი დაეკარგოს.“ - აცხადებს თორნიკე შარაშენიძე.