საქართველოს პრემიერ-მინისტრობის კანდიდატმა გიორგი კვირიკაშვილმა ეროვნული ვალუტის გამყარების საკითხზე ისაუბრა. კვირიკაშვილის თქმით, მომავალი ძალიან მსხვილი ინფრასტრუქტურული პროექტებიდან გამომდინარე, სავარუდოა ლარის გამყარება:

”მომავალი ძალიან მსხვილი ინფრასტრუქტურული პროექტებიდან გამომდინარე, სავარაუდოა ეროვნული ვალუტის გამყარება. ჩვენ ვსაუბრობთ მილიარდობით დოლარის დამატებით ინვესტიციაზე. როგორ მოქმედებს ასეთ შემთხვევაში ეროვნული ბანკი? ჩვენ გვქონდა გაზაფხულზე გამყარების ტენდენცია. ყოველთვის ეროვნული ბანკი უყურებს შედარებით გაცვლის კურსს, იმას თუ სად არის ეფექტური რეალური გაცვლითი კურსი და როგორ არის ის მეზობელ სავაჭრო პარტნიორ ქვეყნებთან მიმართებაში. როდესაც ჩვენი ვალუტა ზომაზე მეტად მყარდება, როგორც წესი, უცხოური ვალუტის შესყიდვას ახდენს ეროვნული ბანკი. ასე მოხდა წელს. დაახლოებით 280 მილიონი დოლარის შესყიდვა მოხდა უცხოური ვალუტის რეზერვებში. როდესაც არის პირიქით, ემოციური რყევები, ამ შემთხვევაში ხდება ასეთი რეზერვის გამოყენება, რომ მრუდი გასწორდეს და არ იყოს ემოციური რყევები. ამიტომ, ეს არის ჩვეულებრივი პროცესი. შეფასების პროცედურები არსებობს და ასეთი შემთხვევაში რაიმე ზედმეტად რთულ პროცედურასთან არ გვაქვს საქმე. ასეთი პრეცედენტები არაერთხელ გვქონია”, - განაცხადა კვირიკაშვილმა.