საქართველოს პარლამენტში ამ წუტებში რიგგარეშე სხდომა მიმდინარეობს. სხდომის ფარგლებში საქართველოს პრემიერ-მინისტრობის კანდიდატმა გიორგი კვირიკაშვილმა დეპუტატებს სამთავრობო გეგმა წარუდგინა, რომლის შემდგომაც დეპუტატებისთვის კითხვების რეჟიმი დაიწყო.

გიორგი კვირიკაშვილს კითხვა დაუსვა დეპუტატმა გედევან ფოფხაძემ, რომელიც ეხება სისხლის სამართლის დამნაშავეებს, რომელთა მიმართაც სახელმწიფომ ვერ მოახერხა, სათანადო ღონისძიებების რეალიზაცია, რაც უნდა გაკეთებულიყო.

„მე 4 წლის განმავლობაში ხშირად დავდიოდი საპატიმრო დაწესებულებებში, ბევრ პატიმართან მქონია შეხვედრა, მაგრამ ნამდვილად ვერ ვიხსენებ პატიმარს, რომელსაც უფრო მეტი დანაშაული ჰქონდეს ჩადენილი მოქალაქეებისა და ქვეყნის წინაშე, ვიდრე მიხეილ სააკაშვილს, ზურა ადეიშვილს, ან სხვა იმ პირს, რომლებიც დღეს ისევ აგრძელებენ თავის დანაშაულებრივ საქმიანობას ჩვენი ქვეყნის და სამშობლოს წინაშე. მე გთხოვთ, რომ ამ საკითხის წამოჭრა კიდევ მოხდეს. მთავრობამ უნდა გვითხრას, რა კეთდება და რა ნაბიჯები უნდა გადავდგათ იმისათვის, რომ მართლმსაჯულება აღსრულდეს და ჩვენი ქვეყნის წინაშე, ვისაც აქვს დანაშაული ჩადენილი, წარდგეს სათანადო მართლმსაჯულების წინაშე,“ - განაცხადა გედევან ფოფხაძემ.