საქართველოს პრემიერ-მინისტრის მოვალეობის შემსრულებელი გიორგი კვირიკაშვილი დღეს „ერთიანი ნაციონალური მოძრაობის“ წევრებსა და „პატრიოტთა ალიანსის“ წარმომადგენლებს საქართველოს პარლამენტის შენობაში შეხვდა. ამ დროისათვის კი შეხვედრა მიმდინარეობს კვირიკაშვილსა და საპარლამენტო უმრავლესობას შორის.

ენმ-სთან შეხვედრის დასრულების შემდეგ საპარლამენტო უმცირესობის ლიდერმა დავით ბაქრაძემ სხდომა შეაფასა. ბაქრაძის თქმით წარმოდგენილ მინისტრთა კაბინეტს არ აქვს გააზრებული თუ რა პრობლემების წინაშე დგას საქართველო:

„დღევანდელ სხდომაზე ოპოზიციის მხრიდან დაისვა ყველა ის შეკითხვა, რომელიც აქტუალური და მნიშვნელოვანია ჩვენი საზოგადოებისა და ჩვენი ქვეყნის განვითარებისთვის. ამ შეკითხვებზე გაცემულმა, ისევე როგორც ვერგაცემულმა პასუხებმა, კიდევ ერთხელ დაგვარწმუნა, რომ წარმოდგენილი შემადგენლობით ამ გუნდს არ ესმის და არ აქვს გააზრებული, რამდენად ღრმა და მძიმე პრობლემების წინაშე დგას ჩვენი ქვეყანა და არ გააჩნია პოლიტიკური ხედვა იმისთვის, რომ მოაგვროს პრობლემები და ქვეყანა წინ წაიყვანოს. აქედან გამომდინარე, ჩვენი დამოკიდებულება წარმოდგენილი სამთავრობის გუნდის მიმართ, რა თქმა უნდა, უარყოფითი იქნება“, - განაცხადა დავით ბაქრაძემ.