საქართველოს პრემიერ-მინისტყრობის კანდიდატი გიორგი კვირიკაშვილი პარლამენტში წარმოდგენილ დეპუტატებს და პარტიებს ხვდება. პრემიერი უკვე შეხვდა „პატრიოტთა ალიანსის“ წევრებს. ამ წუთებში კი უმცირესობის წარმომადგენლებთან მიმდინარეობს შეხვედრა. შეხვედრის დაწყებამდე „ერთიანი ნაციონალური მოძრაობის“ წევრებმა განაცხადეს, რომ ისინი მთავრობის შემადგენლობას მხარს არ დაუჭერენ:

„კითხვები რა თქმა უნდ აქნება ყველა მინისტრთან, განსაკუთრებით ძალოვან მინისტრებსა და ეკონომიკური გუნდის მინისტრებს მოუწევთ ძალიან აქტუალურ კითხვებზე პასუხის გაცემა. თავდაცვისუნარიანობის დაქვეითება აშკარად შესამჩნევია და თავდაცვის მინისტრს მოუწევს ამაზე პასუხის გაცემა, მძიმე კრიმინოგენული ვიტარებაა ქვეყანაში და დარწმუნებული ვარ, რომ მთავრობის ამ შემადგენლობას შესაძლებლობაც კი არ აქვს სარგებელი და სიკეთე მოუტანოს ჩვენ ქვეყანას“, - განაცხადა ნიკა მელიამ.

სერგი კაპანაძის განცხადებით, მათ კითხვები ექნებათ იმ გეგმებზე, რომელიც მთავრობამ წარმოადგინა და დაინტერესდებიან, რეალურად აპირებს თუ არა ხელისუფლება გარკვეულ საკითხებში ფუნდამენტური ცვლილებების გატარებას:

„გვექნება კითხვები, იმ გეგმებთან დაკავშირებით, რომელიც მთავრობას გააჩნია, რომელიც მათ წარმოადგინეს, ფუნდამენტური ხარვეზები და პრობლემები არის ამ პროგრამაში. არ ჩანს კონკრეტულად რომელიმე მნიშვნელოვანი დაპირების შესრულებას აპირებს თუ არა მთავრობა. იქნება ეს ხედვა იმასთან დაკავშირებით როგორ უნდა გაამყარონ ლარი, იქნება ეს ხედვა იმასთან დაკავშირებით, როგორ გაზარდონ მასწავლებლის ხელფასები, როგორ გააუმჯობესონ უსაფრთხოების სიტუაცია, ვიცით რომ ამ ყველაფრის გაკეთებას არ აპირებენ, ამის ყველაზე კარგი მაჩვენებელია ის, რომ მთავრობის შემადგენლობა შეცვლილი არ არის, აქედან გამომდინარე, ჩვენ რა თქმა უნდა მხარს მთავრობის შემადგენლობას არ დავუჭერთ“, - აცხადებს სერგი კაპანაძე.