დედაქალაქის 2017 წლის ბიუჯეტის პროექტს დღეს საკრებულოს სხდომაზე განიხილავენ

პოლიტიკა - 10:56, 25 Nov, 2016

1389

დღეს თბილისის 2017 წლის ბიუჯეტის პროექტს საკრებულოს სხდომაზე განიხილავენ, რის შემდეგაც შენიშვნების პაკეტთან ერთად, ის დედაქალაქის მთავრობას უკან დაუბრუნდება.

მერიამ ბიუჯეტის პროექტის შესწორებული ვარიანტი საკრებულოს დასამტკიცებლად 10 დეკემბრამდე უნდა გადაუგზავნოს.

ოპოზიციაში კვლავ აცხადებენ, რომ ბიუჯეტი დედაქალაქის მოსახლეობის ინტერესებზე გათვლილი არ არის.

"ბიუჯეტს, რომლითაც მცირდება ჯანდაცვისა და სოციალური დახმარების მუხლები, რომლითაც მცირდება ავარიული სახლების გამაგრება, მცირდება ეკონომიკური განვითარების პროგრამები. ასეთი პროექტი დედაქალაქის მერიას უნდა მიუბრუნდეს უკან და დედაქალაქის მერიამ ძირეულად უნდა შეცვალოს აღნიშნული პროექტი და წარმოადგინოს ისეთი ფინანსური დოკუმენტი, რომელიც თბილისელებზე იქნება ორიენტირებული და არა ქართული ოცნების მაღალჩინოსნების ინტერესებზე" - განაცხადა ფრაქცია "ნაციონალური მოძრაობა თბილისის" წევრმა ირაკლი ნადირაძემ.

ოპონენტების ბრალდებებს უმრავლესობაში არ იზიარებენ.

"კომისიებმა და ცალკეულმა დეპუტატებმა, წარმოადგინეს თავისი სურვილი და შენიშვნები და ამ დოკუმენტებთან ერთად ალბათ საკრებულო მიიღებს გადაწყვეტილებას და 2017 წლის ბიუჯეტი ისევ დაბრუნდება მერიაში დასამუშავებლად, რათა გარკვეული პერიოდი მიეცეს მერიას ეს შენიშვნები გაითვალისწინოს და დეკემბრის ათისთვის შემოვა გადამუშავებული ვარიანტი" - აცხადებს ჯაბა სამუშია.