"არ მოვხსნი კანდიდატურას, არანაირი პოლიტიკური შეთანხმება არ ყოფილა"

"არ მოვხსნი კანდიდატურას, არანაირი პოლიტიკური შეთანხმება არ ყოფილა" - ემზარ კვიციანი

პოლიტიკა - 12:32, 24 Nov, 2016

5473

საქართველოს პარლამენტის თავდაცვისა და უშიშროების კომიტეტის თავმჯდომარის მოადგილის თანამდებობაზე დღეს ირაკლი აბესაძესა და ემზარ კვიციანს შორის დეპუტატებს არჩევანი უნდა გაეკეთებინათ, თუმცა, კომიტეტის სხდომაზე არჩევანის გაკეთება ვერ მოხერხდა. ირაკლი აბესაძემ 8, ემზარ კვიციანმა კი 5 ხმა მიიღო, კანდიდატის ასარჩევად მინიმუმ 9 ხმა არის საჭირო.

კანდიდატურის მოხსნას არ აპირებს „პატრიოტთა ალიანსი“. ემზარ კვიციანის განცხადებით, მას არავითარ პოლიტიკურ შეთანხმებაზე ინფორმაცია არ ჰქონია:

„რა თქმა უნდა არ მოვხსნი ჩემს კანდიდატურას, არანაირი შეთანხმება არ ყოფილა. მე მახსოვს კიდევ მიმართულების სარდალი ვიყავი, არ მქონდა უფლება საიდუმლოებასთან შეხების, რა შედეგი მივიღეთ? ვერ გავიგე ის, რომ აპირებდნენ ტერიტორიის გაყიდვას“, - აცხადებს ემზარ კვიციანი.

ირაკლი სესიაშვილის განცხადებით, „ქართული ოცნება“ უარს არ იტყვის პოლიტიკურ შეთანხმებაზე, რომლის მიხედვითაც, 15 თანამდებობიდან, 12 ენმ-ს, 3 კი „პატრიოტთა ალიანსს“ ეკუთვნის. პატრიოტთა ალიანსს კვოტები უკვე გამოყენებული აქვს. ენმ-ს რიგებში კი აცხადებენ, რომ „ქართული ოცნება“ შეთანხმების დარღვევას ცდილობს.