"ჩვენ, უმრავლესობა პოლიტიკურ შეთანხმებას ვუჭერთ მხარს" - სესიაშვილი ენმ-ს კანდიდანტზე საუბრობს

პოლიტიკა - 12:19, 24 Nov, 2016

1589

დღეს საქართველოს პარლამენტის თავდაცვისა და უშიშროების კომიტეტის თავმჯდომარის მოადგილის ვინაობა უნდა გამხდარიყო ცნობილი. თუმცა, დეპუტატებმა ამ თანამდებობაზე კანდიდატის არჩევა ვერ შეძლეს. „პატრიოტთა ალიანსის“ რიგებიდან ემზარ კვიციანი, „ნაციონალური მოძრაობიდან“ კი ირაკლი აბესაძე იყო წარდგენილი. „ქართული ოცნება“ პოლიტიკურ შეთანხმებაზე საუბრობს და აცხადებს, რომ ეს თანამდებობა უმცირესობას ეკუთვნის.

კომიტეტის დასრულების შემდეგ ირაკლი სესიაშვილმა ჟურნალისტებისთვის კომენტარი გააკეთა და განაცხადა, რომ პოლიტიკური გადაწყვეტილება არ შეიცვლება:

„თავად უმცირესობის წარმომადგენლებს უნდა ვკითხოთ, იმიტომ, რომ ისინი სრულად არ იყვნენ წარმოდგენილნი და ირმა ნადირაშვილი დაგვიანებით შემოვიდა. ისინი სრულად რომ ყოფილიყვნენ წარმოდგენილნი, ვფიქრობ, რომ საკითხის გადაწყვეტის პრობლემა არ იქნებოდა. პოლიტიკური შეთანხმება მდგომარეობდა იმაში, რომ შესაბამისი კვოტები გადანაწილდა. 15 კომიტეტიდან 12 კომიტეტის თავმჯდომარის მოადგილის ადგილი ერგო უმცირესობას, დარჩენილი სამი „პატრიოტთა ალიანსის“ წარმომადგენლებს, მათ ეს სამი კვოტა უკვე დაიკავეს, შესაბამისად ჩვენ უმრავლესობა მიუხედავად ჩვენი დამოკიდებულებისა, ამ შემთანხმებას ვუჭერთ მხარს“, - განაცხადა ირაკლი სესიაშვილმა.