„პოლიტიკური შეთანხმება“ - ვინ დაიკავებს თავდაცვისა და უშიშროების კომიტეტის თავმჯდომარის მოადგილის ადგილს

პოლიტიკა - 11:11, 24 Nov, 2016

2308

პარლამენტის თავდაცვისა და უშიშროების კომიტეტის თავმჯდომარის მოადგილის ვინაობა, ოპოზიციის რიგებიდან, დღეს უნდა გარკვეულიყო. აღნიშნულ თანამდებობაზე „პატრიოტთა ალიანსიდან ემზარ კვიციანი, „ნაციონალური მოძრაობიდან“ კი ირაკლი აბესაძე განიხილებოდნენ. თუმცა, დღეს არც ერთი მათგანი არ აურჩევიათ.

რამდენიმე წუთის წინ დასრულდა ამ საკითხზე მსჯელობა. ირაკლი აბესაძემ მიიღო 8 ხმა, ემზარ კვიციანმა კი 5 ხმა. თანამდებობაზე რომელიმე კანიდიდატის ასარჩევად მინიმუმ 9 ხმა არის საჭირო. დღევანდელ სხდომაზე ადგილი ჰქონდა მცირე ხმაურსაც დეპუტატებს შორის.

„მიუხედავად ჩვენი პირადი სიმპათია-ანტიპათიისა, ეს თანამდებობა ეკუთვნის უმცირესობას, ეს არის ჩვენი პოლიტიკური შეთანხმება. ამიტომ, მე გთხოვთ, რომ ამ პოლიტიკურ შეთანხმებას მხარი დაუჭიროთ“, - განაცხადა ირაკლი სესიაშვილმა.

სესიაშვილის განცხადებას ემზარ კვიციანმა უპასუხა და აღნიშნა, რომ არავითარ შეთანხმებას ადგილი არ ჰქონია:

„არავითარი შეთანხმება არ ყოფილა, მაშინ რატომ წარმადგინა პარტიამ? მე ვკითხე პარტიის ლიდერს და არანაირი შეთანხმება არ ყოფილა“, - აღნიშნა კვიციანმა.