ფინანსთა მინისტრობის კანდიდატი დიმიტრი ქუმსიშვილი ნოდარ ხადურის ყოფილ უწყებაში საკადრო ცვლილებებს აანონსებს. ამის შესახებ ქუმსიშვილმა კომენტარი დღეს, მთავრობის ახალი შემადგენლობის დასახელების შემდეგ გააკეთა.

დიმიტრი ქუმსიშვილი კონკრეტულ ცვლილებებზე არ საუბრობს.

საქართველოს პრემიერ–მინისტრის მოვალეობის შემსრულებელმა გიორგი კვირიკაშვილმა მთავრობის ახალი შემადგენლობა სახელმწიფო კანცელარიაში დღეს წარადგინა. ნოდარ ხადური დიმიტრი ქუმსიშვილმა ჩაანაცვლა.

„რაც ეხება ლართან მიმართებაში, მე ადრეც განვმარტე და ახლაც შემიძლია, განვმარტო, რომ ამოცანა არ არის ლარის კურსის დევნა. ამოცანაა დამოკიდებულების შეცვლა, რომ ჩვენს მოსახლეობას ლარის კურსის ცვლილებასთან ერთად არ ეცვლებოდეს ის განკარგვადი შემოსავალი, რაც მათ რჩებად გადასახადების და სესხის მომსახურების გადახდის კვალდაკვალ. ამ პოლიტიკას ჩვენ აუცილებლად განვახორციელებთ ეროვნულ ბანკთან ერთად,“ - განაცხადა დიმიტრი ქუმსიშვილმა.