"მთავარ სისტემურ კითხვაზე პასუხი არ გვაქვს"- ხუხაშვილი მთავრობას 100-დღიან სატესტო ვადას აძლევს

პოლიტიკა - 16:59, 22 Nov, 2016

2889

ექსპერტი გია ხუხაშვილი მინისტრთა კაბინეტის ახალ შემადგენლობას "ნიუპოსტთან" აფასებს. მისი თქმით, ეკონომიკურ გუნდთან დაკავშირებით გადაწყვეტილება საინტერესოა, რადგან მისივე შეფასებით, ეკონომიკისა და მდგრადი განვითარების ყოფილ მინისტრს დიმიტრი ქუმსიშვილს ფინანსთა მინისტრობა უფრო შეეფერება.

ხუხაშვილს ეკონომიკის მინისტრის პოსტზე გიორგი გახარიას წარდგენაც მოსწონს, რადგან მისი თქმით, გახარიამ ეკონომიკურ პროცესსა და სახელმწიფო პოლიტიკას შორის კომუნიკაცია გააჩინა. "ნიუპოსტთან" საუბრისას ექსპერტმა ასევე აღნიშნა, რომ მთავარ კითხვაზე პასუხი ამ დრომდე პასუხგაუცემელია. კერძოდ, ხუხაშვილი ამბობს, რომ მთავრობის ახალმა შემადგენლობამ პასუხი უნდა გასცეს კითხვას რეალურად გადაწყვეტილებების მიმღებებად რჩებიან თუ არა.

"ჩემი აზრით, ეკონომიკურ გუნდში გადაადგილებები საინტერესოა. ქუმსიშვილისთვის ფინანსთა მინისტრობა უფრო შესაფერისია ვიდრე ეკონომიკის მინისტრობა იყო. გახარიას შეყვანა ამ კუთხით ესეც ძალიან საინტერესოა, იმიტომ რომ მან გარკვეული კომუნიკაცია გააჩინა ეკონომიკურ პროცესსა და სახელმწიფო პოლიტიკას შორის. ეს კომუნიკაცია პრინციპში ნორმალური იყო და ესეც თავისთავად პოზიციური ნაბიჯია, თუმცა მთავარ სისტემურ კითხვაზე პასუხი არ გვაქვს, - რეალურად, ინსტიტუციონალურად მინისტრთა კაბინეტია ის ადგილი, სადაც გადაწყვეტილებები მიიღება? შესაბამისად პასუხისმგებლობა მათ კისერზეა, თუ კიდევ არის კითხვები რომელიც საზოგადოებაში მუდმივად არსებობდა? ამ მთავარ კითხვაზე პასუხი არ არის გაცემული, რადგან ძალოვან კაბინეტს ცვლილება პრაქტიკულად არ შეხებია, თუ მინისტრის მოადგილის გადადგომას არ ჩავთვლით. ასე რომ ზედმეტად ოპტიმისტი ვერ ვიქნები და არც ზედმეტი სკეპტიკური განცხადების გაკეთება იქნებოდა სწორი. მთავრობას 100 დღე უნდა ვაცადოთ და ამის შემდეგ უნდა ვისაუბროთ უფრო კონკრეტულად"- აღნიშნა "ნიუპოსტთან" გია ხუხაშვილმა.

რაც შეეხება ვიქტორ დოლიძის კანდიდატურას, ხუხაშვილი ამბობს, რომ "მსგავს ადამიანებზე" კომენტარს არ აკეთებს.

"ჯანსაღ ადამიანურ ნაბიჯად არ მიმაჩნია, როცა ოპოზიციიდან რადიკალურ განცხადებებს აკეთებდე და ორ დღეში მინისტრის სავარძელზე დასკუპდე"- თქვა პოლიტოლოგმა.

პრემიერ-მინისტრის მოვალეობის შემსრულებელმა გიორგი კვირიკაშვილმა დღეს მთავრობის ახალი შემადგენლობა წარადგინა.

ახალ შემადგენლობაში სამი ახალი სახე იქნება. ეკონომიკისა და მდგრადი განვითარების მინისტრის თანამდებობაზე - გიორგი გახარიას, რეგიონული განვითარებისა და ინფრასტრუქტურის მინისტრის თანამდებობაზე - ზურაბ ალავიძის, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის თანამდებობაზე კი ვიქტორ დოლიძის კანდიდატურები დასახელდა.