რა ხდება ტელევიზიებში? - პრეზიდენტი მედიაში მიმდინარე პროცესებზე გამჭვირვალე პასუხებს ითხოვს

პოლიტიკა - 15:51, 22 Nov, 2016

1584

პრეზიდენტის პრესსპიკერის ეკა მიშველაძის თქმით, პრეზიდენტი მიიჩნევს, რომ მედიაში სტაბილურობა, ჟურნალისტური საქმიანობის დაცულობა არის სახელმწიფოს დემოკრატიული ფუნქციონირების ერთერთი მთავარი ფაქტორი, ამიტომ ამ თემასთან დაკავშირებულ ყველა კითხვას გასაგები და გამჭვრივალე პასუხი უნდა გაეცეს. აღნიშნულ საკითხზე მიშველაძემ დღეს გამართულ ტრადიციულ ბრიფინგზე ისაუბრა:

„მიუხედავად იმისა, რომ 2012 წლიდან სიტყვის თავისუფლების თვალსაზრისით გარემო თვისობრივად გაუმჯობესდა, ბოლო წელიწადნახევრის განმავლობაში მედიაში მიმდინარე პროცესებმა არაერთი კითხვის ნიშანი გააჩინა როგორც ქვეყნის შიგნით, ასევე ქვეყნის გარეთ. ეს ის საკითხებია, რაზეც პრეზიდენტს მუდმივად უწევს საუბარი ოფიციალურ თუ არაოფიციალურ შეხვედრებზე. პრეზიდენტი მიიჩნევს, რომ მედიაში სტაბილურობა, ჟურნალისტური საქმიანობის დაცულობა არის სახელმწიფოს დემოკრატიული ფუმქციონირების ერთ-ერთი მთავარი ფაქტორი. ყველა კითხვას და ეჭვს, რომელიც მედია-თემატიკასთან დაკავშირებით არსებობს, უნდა გაეცეს გასაგები და გამჭვირვალე პასუხი.“- განაცხადა ეკა მიშველაძემ. კითხვაზე კონკრეტულად რომელ ფაქტებს გულისხმობდა პრეზიდენტის პრესმდივანი, ეკა მიშველაძემ განაცხადა, რომ კითხვის ნიშნები გააჩინა თითქმის ყველა ტელევიზიაში მიმდინარე პროცესებმა.

„ჩვენ ვგულისხმობდით აბსოლუტურად ყველა პროცესს, რომელიც მიმდინარეობს ამ წელწადნახევრის განმავლობაში, რაც დაიწყო ჩემი და ინგა გრიგოლიას გადაცემის დახურვასთან დაკავშირებით, ხოლო შემდეგ მაესტროში მიმდინარე პროცესები გაგრძელდა რუსთავი2-ით, შემდეგ კი გაგრძელდა თუნდაც იგივე საზოგადოებრივი მაუწყებლის თემით. რამაც გააჩინა არაერთი შეკითხვა“- აღნიშნა ეკა მიშველაძემ.