"რუსეთი აფხაზეთთან და სამხრეთ ოსეთთან დაკავშირებით თავის პოზიციას არ გადახედავს"

"რუსეთი აფხაზეთთან და სამხრეთ ოსეთთან დაკავშირებით თავის პოზიციას არ გადახედავს" - კარასინი

პოლიტიკა - 17:22, 21 Nov, 2016

7083

რუსეთის საგარეო საქმეთა მინისტრის მოადგილის გრიგორი კარასინის თქმით, მიუხედავად იმისა, რომ 2012 წლის შემდეგ რუსულ-ქართული ურთიერთობები მნიშვნელოვნად წინ წავიდა, რუსეთი არ აპირებს აფხაზეთთან და სამხრეთ ოსეთთან დაკავშირებით თავის პოზიციაზე უარი თქვას. ამის შესახებ განცხადება კარასინმა Sputnik Беларусь-თან ინტერვიუში გააკეთა.

„საქართველო კვლავ დაჟინებით მოითხოვს, რომ აფხაზეთისა და სამხრეთ ოსეთის დამოუკიდებლობის ცნობასთან დაკავშირებით ჩვენს გადაწყვეტილებას გადავხედოთ. ეს არარეალურია დღეს და არ იქნება რეალური არასოდეს. აქედან უნდა გამოვიდეთ. ჩვენ ამას ვუწოდებთ რეგიონში არსებულ ახალ რეალობას.“- განაცხადა კარასინმა.

ამასთანავე რუსმა დიპლომატმა აღნიშნა, რომ დიპლომატიური ურთიერთობის გაწყვეტა რუსეთთან საქართველოს მხრიდამ მოხდა, ამიტომ საქართველოსთან ვიზალიბერალიხაციის საკითხთან დაკავშირებით ილუზიების შექმნა არაა საჭირო.

ლავროვის მოადგილემ გაიხსენა 2008 წლის მოვლენები და საქართველო ე.წ სამხრეთ ოსეთზე თავდასხმაში კიდევ ერთხელ დაადანაშაულა.

„რუსეთი დაეხმარა სამხრეთ ოსეთს დაეცვა დამოუკიდებლობა, შემდეგ კი მალევე აღიარა სამხრეთ ოსეთისა და აფხაზეთის დამოუკიდებლობა. მას შემდეგ 8 წელი გავიდა.“- განაცხადა კარასინმა.

2008-დან 2012 წლამდე პერიოდს კარასინმა „გაბოროტებული და ღიად ანტირუსული რიტორიკის“ დრო უწოდა. 2012 წლის ბოლოდან, მისი თქმით გარემოებები შეიცვალა. საქართველოს ახალი ხელმძღვანელობა გამოვიდა წინადადებით, განეხილათ რუსეთთან ურთიერთობის ნორმალიზების საკითხი იმ სფეროებში, სადაც ეს შესაძლებელი იყო.

„ჩვენ კმაყოფილები ვართ იმით, თუ რამდენად გამოსწორდა სიტუაცია ჰუმანიტარულ კონტაქტებში, ტრანსპორტში და ვაჭრობაში.“- აღნიშნა კარასინმა. მან ასევე განაცხადა, რომ რუსეთი შევიდა საქართველოს 5 ყველაზე მნიშვნელოვან სავაჭრო პარტნიორში. გაიხსნა რუსული ბაზარი ქართული ღვინისთვის და მინერალური წყლისთვის და ახლა „ არსებობს ამ პროცესის გაგრძელების პერსპექტივა“.