პრინციპული, გაწონასწორებული, გადაწყვეტილებების სწრაფად მიმღები კანდიდატი წარვადგინეთ

პრინციპული, გაწონასწორებული, გადაწყვეტილებების სწრაფად მიმღები კანდიდატი წარვადგინეთ - მდინარაძე კობახიძეზე

პოლიტიკა - 17:40, 18 Nov, 2016

1823

ფრაქცია ”ქართული ოცნების” თავმჯდომარე, მამუკა მდინარაძე მე-9 მოწვევის პარლამენტის პირველ სხდომაზე პარლამენტის თავმჯდომნარეობის კანდიდატზე ისაუბრა და აღნიშნა, რომ ირაკლი კობახიძე პრინციპული, გაწონასწორებული, გადაწყვეტილებების სწრაფად მიმღები პიროვნებაა.
”ჩვენმა გუნდმა წარმოადგინა კანდიდატი, რომელიც არის პრინციპული, გაწონასწორებული, გადაწყვეტილებების სწრაფად მიმღები, სამართლის დოქტორი, კონსტიტუციონალისტი და მისი ეს თვისებები იმედის საფუძველს გვაძლევს, რომ მისი საქმიანობა და საქართველოს პარლამენტის საქმიანობა იქნება სწორედ ჩვენს პროგრამულ საკითხებზე ორიენტირებული და ეს საკითხები იქნება უზრუნველყოფილი. ამით ჩვენი ქვეყანა მიაღწევს წარმატებას. ჩვენ მზად ვართ, რომ არ დავიშუროთ ძალისხმევა ჩვენი ქვეყნის წარმატების საქმეში”, - განაცხადა მდინარაძემ.

მდინარაძე თვლის, რომ საქართველო უნდა გახდეს ევროპული ოჯახის სრულფასოვანი წევრი ქვეყანა და ამ მიზნისკენ სწრაფვა არა მხოლოდ დეკლარირებით უნდა მოხდეს, როგორც ეს ხდებოდა ყოფილი ხელისუფლების დროს.
”ჩვენ გვახსოვს ყოფილი მმართველი გუნდის არაერთი ქმედება წლების განმავლობაში, რომელიც სხვა ქვეყნის წისქვილზე ასხამდა წყალს და არანაირად არ იყო ის ხაზი დაცული, რასაც ისინი ცდილობდნენ საზოგადოების თვალში წარმოეჩინათ. აქ არ იყო ევროპულობის ჩანასახიც კი. არა მხოლოდ დეკლარირებით, არამედ საქმით უნდა დავამტკიცოთ ჩვენი სწრაფვა ევროპისა და დასავლეთისკენ საქართველოში უნდა დადგეს დრო და ჩვენ ამას უზრუნველვყოფთ, რომ სახელმწიფოს გამართული ფუნქციონირება არ იყოს მხოლოდ პერსონებზე დამოკიდებული და ეს სისტემებზე უნდა უზრუნველყოს. ამის საფუძველს მაძლევს ის გუნდი, რომელიც პარლამენტშია წარმოდგენილი. ეს არის პროფესიონალებით დაკომპლექტებული, გულწრფელი და სამშობლოს მოყვარული გუნდი”, - აღნიშნა ფრაქციის თავმჯდომარემ.