"რუსთავი2"-ის საქმის განხილვა დახურულ კარს მიღმა- ოპოზიცია პოლიტიკურ ინტერესებზე საუბრობს

პოლიტიკა - 10:41, 17 Nov, 2016

1355

უზენაეს სასამართლოს მიერ რუსთავი 2-ის საჩივრების განხილვის დაწყებას პოლიტიკოსები აფასებენ.

"ქართული ოცნება" ტრადიციულად აცხადებს, რომ მათი მხრიდან პოლიტიკურ ჩარევას ადგილი არ აქვს.

„მნიშვნელოვანია რომ ჩვენ შევინარჩუნოთ მედიის თავისუფლების ის მაღალი სტანდარტი, რომელიც ბოლო წლების განმავლობაში აღინიშნა არაერთ საერთაშორისო ანგარიშში, ასევე მეორეს მხრივ მნიშვნელოვანია თვალი მივადევნოთ სამართლიანი სასამართლოს უფლების განხორციელებას. ამიტომ დაველოდოთ სასამართლოს გადაწყვეტილებას, ჩვენ უკვე მას შემდეგ რაც პარლამენტი დაიწყებს საქმიანობას, მივადევნებთ თვალს ამ პროცესს,“- აღნიშნა თემის კომენტირებისას არჩილ თალაკვაძემ.

სასამართლოს მხრიდან საქმის ზეპირ განხილვაზე უარის თქმა ოპოზიციას დამატებით კითხვებს უჩენს.

"მხარეები არ იქნება წარმოდგენილი საქმის განხილვაზე, რაც არის იმის ინდიკატორი, რომ საქმე არ მიდის კანონის და კონსტიტუციის შესაბამისად და უზენაესი სასამართლოც, როგორც ჩანს იგივე ხაზის გაგრძელებას აპირებს. ეს რა თქმა უნდა არის გაგრძელება რუსთავი 2-ზე შეტევის,“-განაცხადა ოთარ კახიძემ.

ხელისუფლების პოლიტიკურ ინტერესებზე საუბრობს თავდაცვის ყოფილი მინისტრი თინა ხიდაშელი.

„ჩვენ კანონი იმიტომ შევცვალეთ და სხდომათა დარბაზში დავუშვით კამერები, რომ ამ ტიპის სპეკულაციები დასრულებულიყო, ამიტომ როდესაც ხელისუფლება არ იყენებს საჯაროობის და გამჭვირვალობის ყველაზე მთავარ ინსტრუმენტს, ეს რა თქმა უნდა შემდეგ ძალიან ბევრ ეჭვს აჩენს და ყველას უქმნის იმის განცდას და შთაბეჭდილებას, რომ რაღაც არის დასამალი კარის უკან, თუ ეს კარი იხურება,“-აღნიშნავს თინა ხიდაშელი.