"იზორიას ზღაპრები" - ხიდაშელი თავდაცვის მინისტრს აკრიტიკებს

პოლიტიკა - 19:14, 16 Nov, 2016

2323

ლევან იზორიას განცხადებას, რომელიც ავიაციის რეფორმირებას უკავშირდება მისი წინამორბედი "ზღაპარს" უწოდებს.

თინა ხიდაშელი აცხადებს, რომ თავდაცვის სამინისტროს მოქმედი ბიუჯეტით ავიაციის სფეროს რეფორმირება შეუძლებელია. მეტიც, თინა ხიდაშელი ამბობს, რომ ამ მიმართულების რეფორმირებისთვის აუცილებელია, რომ თავდაცვის სამინისტროს ბიუჯეტი 2-ჯერ ან 3-ჯერ მაინ გაიზარდოს.

"მთავარი პრობლემა იმაშია, რომ რეფორმა არ ნიშნავს გვარებს და სახელებს, რეფორმა ნიშნავს ხედვას. საქართველოში პრობლემა იმდენად დიდია, რომ ამაზე სერიოზულად სალაპარაკოდ 2-ჯერ და 3-ჯერ უნდა გაიზარდოს ბიუჯეტი. ბატონი იზორია მოგონილი ამბებით ცდილობს მიყიდოს საზოგადოებას ზღაპრები, რომ თითქოს რამეს აკეთებს. სანამ არ გაიზრდება თავდაცვის სამინისტროს ბიუჯეტი, მანამდე რაიმე რეფორმაზე ავიაციაში შეუძლებელია საუბარი"- აცხადებს თინა ხიდაშელი.

ხიდაშელი ამბობს, რომ ლევან იზორია მიზანმიმართულად ათავისუფლებს თავდაცვის სამინისტროდან კადრებს, რომლებსაც განათლება მიღებული აქვთ დასავლეთში.

"კანონი მინისტრს აძლევს დისკრეციის საშუალებას. მაგრამ, არსებობს კრიტერიუმები, შერჩევის წესები. ადამიანები მათი კვალიფიკაციის და სამართლიან გარემოში ინიშნებიან და წინაურდებიან ამა თუ იმ თანამდებობაზე. ეს არის ზუსტად ის ამბავი, როცა რაღაც კონკრეტული მიზეზებით ინიშნებიან ადამიანები და არა კვალიფიკაციითა და გამოცდილებით. მე მოვისმინე აზრი, რომ საერთოდ ავიაციის სარდალი პრეზიდენტის მიერ ინიშნებოდეს, ესეც სადაო თემაა. რაც არ არის სადაო არის ის, რომ ადამიანები თანამდებობაზე დანიშვნის დროს, სამართლიან პირობებში უნდა დგებოდნენ და უნდა აკმაყოფილებდნენ კრიტერიუმებს და ისე იკავებდნენ თანამდებობებს,"- აცხადებს თინა ხიდაშელი.