ცენტრალურმა საარჩევნო კომისიამ (ცესკო) დღეს გამართულ სხდომაზე 2016 წლის პარლამენტის არჩევნების საბოლოო შედეგები შეაჯამა.

„ცესკომ დღევანდელ სხდომაზე 2016 წლის პარლამენტის არჩევნები საბოლოო შედეგების შეჯამებით დაასრულა. მინდა ყველა ჩართულ მხარეს გადავუხადო ძალიან დიდი მადლობა. ჩვენ ყველამ ერთად შევძელით ამ არჩევნების ჩატარება. თითოეულმა ჩვენგანმა ჩავდეთ ძალიან დიდი ძალისხმევა იმაში, რომ საქართველოს პარლამენტის არჩევნები ისტორიაში შესულიყო როგორც უკეთესი და პოზიტიურად განხორციელებული პროცესი, რომელმაც საქართველო, საერთაშორისო შეფასებების ჭრილში, დაამკვიდრა როგორც რეგიონში ლიდერი ქვეყანა საარჩევნო დემოკრატიის განვითარების კუთხით“- განაცხადა ცესკოს თავმჯდომარე თამარ ჟვანიამ ჟურნალისტებთან საუბრისას.

შემაჯამებელი ოქმი სხდომაზე კომისიის წევრებს ცესკოს მდივანმა გიორგი ჯავახიშვილმა წარუდგინა. ოქმის თანახმად, პარლამენტის არჩევნებისთვის ამომრჩეველთა საერთო რაოდენობა 3 513 884-ს შეადგენდა, პროპორციული საარჩევნო სისტემით ჩატარებულ არჩევნებში მონაწილე ამომრჩეველთა რაოდენობამ 1 825 054 შეადგინა.

არჩევნების საბოლოო შედეგების მიხედვით საუკეთესო შედეგის მქონე საარჩევნო სუბიექტების მიერ მიღებული მანდატების რაოდენობა შემდეგია:

№41- „ქართული ოცნება - დემოკრატიული საქართველო” – 115;
№5 - „ერთიანი ნაციონალური მოძრაობა” – 27;
№8 - „დავით თარხან-მოურავი, ირმა ინაშვილი - საქართველოს პატრიოტთა ალიანსი, გაერთიანებული ოპოზიცია” – 6;
№19 - „თოფაძე - მრეწველები, ჩვენი სამშობლო” -1;
№42 - საინიციატივო ჯგუფი - 1.