"რუსეთის გადაწყვეტილება არანაირი სამართლებრივი შედეგის მომტანი არ არის"- იუსტიციის სამინისტრო

პოლიტიკა - 18:08, 16 Nov, 2016

1353

რუსეთის 16 ნოემბრის გადაწყვეტილებას, არ გახდეს რომის სტატუტის წევრი, საქართველოს იუსტიციის სამინისტრო ეხმაურება.

სამინისტროში განმარტავენ, რომ რუსეთის ეს ქმედება არანაირი სამართლებრივი შედეგის მომტანი არ არის და ვერ იქონიებს გავლენას 2008 წლის ომის საქმის გამოძიებაზე.

„როგორც ცნობილია რუსეთმა ხელი მოაწერა სტატუტს 2000 წელს, მაგრამ არ გაუკეთებია რატიფიკაცია. შესაბამისად, ამ მომენტამდე რუსეთის ფედერაცია ისეც არ იყო სტატუტის მხარე. ეს ამ საქმის გამოძიების დამაბრკოლებელი ფაქტორი არც იყო და ვერც გახდება, ვინაიდან საქართველო არის რომის სტატუტის მხარე და შესაბამისად, საერთაშორისო სისხლის სასამართლოს იურისდიქცია ვრცელდება 2008 წლის ომის დროს საქართველოში სავარაუდოდ მომხდარ სტატუტით გათვალისწინებულ დანაშაულებზე. ამას ადასტურებს ისიც, რომ საერთაშორისო სისხლის სამართლის სასამართლოს წინასასამართლო პალატის 2016 წლის 27 იანვრის გადაწყვეტილება მოიცავს რუსეთის პასუხისმგებლობის საკითხსაც.

ამდენად, რუსეთის 2016 წლის 16 ნოემბრის გადაწყვეტილება არანაირი სამართლებრივი შედეგის მომტანი არ არის და იგი გავლენას ვერ იქონიებს მიმდინარე გამოძიებაზე, ერთადერთი კიდევ ერთხელ აჩვენებს ვის არ სურს სიმართლის დადგენა 2008 წლის ომის საქმეზე.

2016 წლის 27 იანვარს საერთაშორისო სისხლის სასამართლოს წინასასამართლო პალატამ მიიღო გადაწყვეტილება საერთაშორისო სისხლის სამართლის სასამართლოს პროკურორის მიმართვის საფუძველზე, რომ დაიწყოს გამოძიება ცხინვალის რეგიონში და მის ირგვლივ 2008 წლის 1 ივლისიდან 10 ოქტომბრის პერიოდში ჩადენილ დანაშაულებზე.“- განმარტავენ უწყებაში.