"ნაჩქარევი განცხადება გავაკეთე, საბოლოო სიტყვა პრეზიდენტს ეკუთვნის" - ვოლსკი პარლამენტის პირველი სხდომის თარიღზე

პოლიტიკა - 17:55, 16 Nov, 2016

4747

"ქართული ოცნების" ლიდერი გია ვოლსკი პარლამენტის პირველი სხდომის თარიღთან დაკავშირებით დილით გაკეთებულ განცხადებას ცვლის და ამ თემაზე გაკეთებულ განცხადებას ნაჩქარევს უწოდებს.

როგორც "ნიუპოსტს" ვოლსკიმ უთხრა, პირველი სხდომის თარიღს პრეზიდენტი დისკრეციის ფარგლებში ჩანიშნავს.

"ნაჩქარევი განცხადება იყო იმასთან დაკავშირებით, რომ ეს თარიღი უკვე გადაწყვეტილია. გუნდში სურვილია, რომ პარლამენტის პირველი სხდომა 18-ში უნდა ჩატარდეს. თუმცა ჩემი განცხადება ნაჩქარევია იმდენად, რამდენადაც საბოლოო სიტყვა პრეზიდენტს ეკუთვნის და ვფიქრობ, რომ პრეზიდენტის განკარგულებას უნდა დაველოდოთ"- უთხრა "ნიუპოსტს" გია ვოლსკიმ.

ცნობისთვის დღეს პრეზიდენტის ადმინისტრაციამ დეპუტატებს მოუწოდა, პარლამენტის პირველი სხდომის ჩანიშვნის შესახებ ნაჩქარევი განცხადებების გაკეთებისგან თავი შეიკავონ, ვინაიდან თარიღის განსაზღვრა პრეზიდენტის პრეროგატივაა.

დილით კი ვოლსკი აცხადებდა, რომ "ვფიქრობთ, რომ პარლამენტის პირველი სხდომა 18-ში უნდა ჩატარდეს და ამაში საწყენი არაფერია.

მეტიც დეპუტატმა თემის კომენტირებისას აღნიშნა, რომ "განცხადება იმის თაობაზე, რომ პირველი სხდომის თარიღთან დაკავშირებით არ დაველოდეთ პრეზიდენტის გადაწყვეტილებას, უადგილოა".