,,გირჩის მუქარა პიარღონისძიებაა“ - მამუკა მდინარაძე მარიხუანა დეკრიმინალიზაციასა და ნარკოპოლიტიკაზე

პოლიტიკა - 16:22, 16 Nov, 2016

3173

მარიხუანას დეკრიმინალიზაციასთან დაკავშირებით „გირჩის“ ინიციატივას უმრავლესობის ახალი სახე - მამუკა მდინარაძე "ნიუპოსტთან" გამოეხმაურა. მისი თქმით, გირჩის ინიციატივა პიარ ღონისძიებაა.
"გია ვოლსკის აბსოლუტურად სწორი შეფასება გაუკეთებია (იხ. გია ვოლსკის შეფასება: "ასეთი განცხადებებით საზოგადოების დაბოლებას აქვს ადგილი"). ეს ინიციატივა ჩვეულებრივი პიარ ღონისძიებაა და რეალობასთან ახლოს არ არის. რაც შეეხება ნარკოპოლიტიკის მიმართულებას, ჩვენი მხრიდან დაანონსებული იყო, რომ მომხმარებელთა მიმართ ჩვენ აუცილებლად ლიბერალურები უნდა ვიყოთ და მკურნალობაში უნდა დავეხმაროთ მათ და არა ციხეში ჩავსვათ. ჩვენი გუნდის წევრების განცხადებაც კი არასწორად იქნა აღქმული. მართალია გამსაღებლების მიმართ ჩვენი პოლიტიკა იქნება ხისტი, რაც შეიძლება მკაცრი, მაგრამ ხაზგასმით ვამბობ, რომ ეს არ შეეხება მომხმარებლებს, რადგან ისინი სახელმწიფოს მხრიდან დახმარებას, მკურნალობას და რესოციალიზაციას საჭიროებენ და შესაბამისად აქ, ამ შემთხვევაში ლიბერალურები ვიქნებით, ეს ჩვენ წინასაარჩევნო პერიოდშიც განვაცხადეთ"- აღნიშნა მამუკა მდინარაძემ.

"ნიუპოსტმა" "ქართული ოცნების" ახალ სახეს, მისივე თანაგუნდელის კობა ნარჩემაშვილის განცხადება შეახსენა: ,,ნარკოტიკების მომხმარებელი უნდა ისჯებოდეს“ - რომელსაც მდინარაძემ კონტექსტიდან ამოგლეჯილი უწოდა.

"ჟურნალისტებს გიყვართ მსგავსი სათაურების გამოტანა, ეს გასაგებია, ალბათ ჟურნალისტი რომ ვიყო, მეც ასე მოვიქცეოდი. ეს სათაური კი კონტექსტს არ ასახავს. მე არამარტო ნარჩემაშვილის განცხადებაზე ვამბობ. ძალიან ხშირად ხდება ასე - არასწორად გაგება იმ კონტექტსტისა, რომელსაც განმცხადებელი აკეთებს"- თქვა მდინარაძემ.